Мэҥэ Хаҥалас улууһугар полиция оперативниктара 70 киилэ эти уорууга уорбаланааччыны биир суукка иһинэн туттулар.
Төҥүлү сэлиэнньэтин биир олохтооҕун хоспоҕуттан түүн 70 киилэ ынах этэ сүппүт. Бу уорууга уорбаланааччыны — урут уорууга түбэһэн сууттана сылдьыбыт 38 саастаах киһини — оперативниктар суукканы кыайбат кэм иһигэр кимин быһаарбыттар.
Барыллаан быһаарыынан, уоруйах ол киһи дьиэтин аттынан ааһан иһэн, хоспоххо ынах этэ кыстанан сытарын көрөөт, уоруон баҕарбыт. Уонна ол санаатын толорон, түүн буолбутун кэнниттэн анаан-минээн тиийэн, хатааһына суох хоспохтон эттэри сүгэн илдьэ барбыт.
Уоруллубут эттэн сороҕун босхону үрдүнэн сыанаҕа атыылаабыт, сороҕун ыалларыгар уурдарбыт. Тутуллубутун кэнниттэн, ол эт барыта былдьаммыт.
Бу чахчынан «уоруу» ыстатыйанан холуобунай дьыала тэриллибит. Бу 158-с ыст. 2-с чааһынан көрүллэр накаастабыл миэрэ — 5 сылга диэри көҥүлү быһыы.
СӨ ИДьМ-тын пресс-сулууспата:
— Билигин идэһэ өлөрүүтэ саҕаламмытынан, бу кэмҥэ эти уоруу элбиирин туһунан сэрэтэбит. Онон, эккитин-аскытын харайа уурбут сирдэргитин үчүгэйдик хатыыргытыгар сүбэлиибит.
Биһиги корр., «Саха сирэ» хаһыат, edersaas.ru
Хаартыска: интэриниэттэн.