Өрөспүүбүлүкэ үрдүнэн уу эбийиэктэригэр куттала суох буолуу ыйа биллэриллэн, бу күннэргэ ЫБММ, ГИБДД иниспиэктэрдэрэ Дьокуускай куорат дьаһалтатын үлэһиттэрин кытары рейдэ оҥордулар.
Рейдэ Дьокуускай куорат Күөх хонуутун оройуонугар ыытылынна.
– Билигин Өлүөнэ өрүһү Дьокуускай — Аллараа Бэстээх, Хатас — Павловскай, Кангаласс — Суотту хайысхаларынан туорааһын көҥүллэнэр. Бу официальнай туоруур сирдэр. Ол гынан баран сорох суоппардар оҥоһуллубатах сиринэн өрүһү туорууллар. Кыһыҥҥы суол туруоҕуттан оҥоһуллубатах сиринэн өрүһү туораабыт суоппардарга 70 боротокуол оҥоһулунна, – диэн ЫБММ иниспиэктэрэ Майя Жиркова иһитиннэрдэ.
Быраабыланы кэһэр суоппардар административнай эппиэтинэскэ тардыллан, ыстарааптаналлар. Ол курдук физическэй сирэйдэр 3 — 5 тыһ. солк., дуоһунастаах дьон – 20 — 50 тыһ. солк., юридическэй сирэйдэр – 100 тыһ. солк. саҕалаан 1 мөл. солк. диэри ыстарааптаныахтарын сөр.
ЫБММ пресс-сулууспата