Бу күннэргэ социальнай ситимнэринэн Дьокуускай куорат 7-с нүөмэрдээх оскуолатын үөрэнээччитэ билбэт киһитэ снюс биэрбитин ыстаабыт диэн ис хоһоонноох сурук уонна видео тарҕанна. Саха иһитиннэрэр агентствотыгар, бу Дьокуускай куорат 7-с оскуолатын үөрэнээччитэ буолбатах диэн, тустаах тэрилтэ дьаһалтата быһаарбыт.
“Саха сирэ” хаһыат, edersaas.ru
Суругу кытта тарҕаммыт видеоҕа көстөрүнэн, оҕо ийэтин ыйытыытыгар даҕаны хоруйдуур кыаҕа суох. “Суһаллык бөлөхтөргүтүгэр ыытыҥ!!! Чаас антах өттүгэр, 10.12.19 чыыһылаҕа 7-с нүөмэрдээх оскуолаҕа сорох оҕолорго маннык ыастары түҥэтэлээбиттэр. Бу СНЮС! Суһаллык оҕолоргутугар төлөпүөннээҥ уонна ыстаамаҥ диэн этиҥ. Онно никотин олус улахан дозата баар!”, — диэн суруллубут.
Бу видеоҕа көстөр быһылаан Новосибирскай куоракка тахсыбыт, билигин бэрэбиэркэ бара турар, оҕо тыҥатын искусственнай тыыннарыы (искусственная вентиляция легких) аппараатыгар холбообуттар диэн СИА суруйар.
Онтон СӨ Үөрэҕин уонна наукатын министиэристибэтиттэн быһаарыы сурук көрдөөбүппүтүгэр: “Өрөспүүбүлүкэҕэ профилактическай үлэ ситимин быспакка ыытыллар. Наркотигы утары үлэ иитинэн, оскуола үөрэнээччилэригэр, тус сыаллаах бөлөхтөргө, саастарыттан көрөн, араас тэрээһиннэр бараллар. Бу — аддиктивнай быһыы трениннэрэ, биирдиилээн профилактическай-коррекционнай үлэлэр, төрөппүттэргэ практическай-ориентированнай бүттүүн үөрэхтээһин, педагогтарга сэминээр. СӨ Үөрэҕин уонна наукатын министиэристибэтэ ИДьМ уонна Доруобуйа харыстабылын министиэристибэлэрин кытта бииргэ үлэлэһии чэрчитинэн араас тэрээһиннэри кыттыһан ыытар.
Улуустааҕы үөрэх управлениеларын иһитиннэриилэринэн, 2019 сыл от ыйын 1 күнүнээҕи туругунан, СӨ үөрэҕин тэрилтэлэригэр чөл олоҕу тарҕатыы 654 уопсастыбаннай поһа (605 – оскуолаларга, 49 орто анал үөрэх тэрилтэлэригэр) баар. Үөрэх тэрилтэлэригэр чөл олоҕу тарҕатыыга үлэлэһэр постары мониториннааһын көрдөрөрүнэн, оскуолаларга ыытыллар профилактика үлэтэ үөрэнээччилэр веществоларынан (ПАВ) үлүһүйүүлэрин аччатарга үтүө түмүктээҕэ көстөр”, — диэн хоруйдаатылар.
Людмила ПОПОВА, “Саха сирэ” хаһыат, edersaas.ru