7-с кылаас кинигэтигэр киирбит “Ат уола Аталамии букатыыр” сахалыы айымньы буолбатах
Бу күннэргэ социальнай ситимнэринэн “Бичик” кинигэ кыһата таһаарбыт, саха оскуолатыгар аналлаах саха литэрэтиирэтин кинигэтиттэн “Ат уола Аталамии букатыыр” диэн айымньыны хаартыскаҕа түһэрэн тарҕаттылар.
Сахалыы тыллаах дьон, төрөппүттэр ити айымньыны ааҕан араас санааны эттилэр. Үгүстэр “ама оҕолорбутун маннык кырамаатыкалаах кинигэнэн үөрэтэбит дуо? Уонна туох үөрэҕи ирдиэххэ сөбүй?”, “барыта сыыһа”, “киһи сатаан аахпат кинигэтэ”, “киһи ааҕан сиппэт сыыһалара”, “бу маннык, оҕо буккуллар кинигэлэрин кимнээх таһааралларый?” эҥин диэн ис хоһоонноох суруйдулар.
Быһаарыы ылаары “Саха сирэ” хаһыат, edersaas.ru саайт СӨ Үөрэҕин уонна наукатын министиэристибэтиттэн туоһуластыбыт.
“Ат уола Аталамии букатыыр” – долган тылынан суруллубут олоҥхоттон быһа тардыы. Үгүстэр маны ааҕан сахалыы суруллубут тиэкис дии санаатылар. Ол эрээри, сахалыы буолбатах. Итини сэргэ, сороҕор Афанасий Уваровскай “Ахтыылар” айымньытын көрөн эмиэ абарбыттарын биллэрээччилэр. Бу тиэкис эмиэ тустаах учуобунньукка киирэ сылдьар. Аныгы кырамаатыканан сирдэттэххэ, эмиэ туох даҕаны кырааматынаһа суохтук суруллубут. Ол гынан баран, маны Уваровскай 19-с үйэҕэ, саха кырамаатыката суох кэмигэр суруйбута. Онтон айымньы — устуоруйа буолар. Билигин төһө даҕаны алҕастааҕын иһин, биһиги ону бэйэбит баҕарбыппытынан уларытар бырааппыт суох.
Тустаах тиэкистэри национальнай литэрэтиирэ төрүттэрин эгэлгэтэ элбэҕин, баайын үөрэнээччилэр уонна учууталлар билэллэрин, литэрэтиирэ аныгы көрүҥэ олохсуйуор диэри үгүс сыллар устата сайдан кэлбитин өйдөтөр сыалтан учуобунньукка киллэриллэллэр”, — диэн “Бичик” кинигэ кыһатын үөрэххэ уонна оҕоҕо таһаарыыларын киинин салайааччыта Марина Никифорова быһаарыытыгар олоҕуран министиэристибэ хоруйдаата.
Онон түмүктээн эттэххэ, 7-с кылаас учуобунньугар киирбит “Ат уола Аталамии букатыыр” долган тылынан суруллубут олоҥхоттон быһа тардыы буолар. Төрүттэрбит биир буолан, тылбыт даҕаны майгыннаһар.
Людмила ПОПОВА, “Саха сирэ” хаһыат, edersaas.ru