Москваттан Арассыыйа сүүмэрдэммит хамаандатын чилиэнэ, соторутааҕыта Абу-Даби куоракка (ХАЭ) буолан ааспыт WorldSkills аан дойдутааҕы чөмпүйэнээтигэр үрдүк көрдөрүүтүн иһин медальон ылбыт кондитер-устудьуон Степан Кириллин кэлбитэ.
edersaas.ru
Степан үөрэнэр буолан, Дьокуускайга сырыытын кыраапыга ыгым. Ол курдук, СӨ Үөрэҕин уонна наукатын министиэристибэтэ, ВорлдСкилс эрэгийиэннээҕи салаата иһитиннэрбиттэринэн, кини сэтинньи 7 күнүгэр (оптуорунньукка) Аллараа Бэстээххэ Транспортнай техникумҥа маастар-кылаас ыытта.
Сэтинньи 8 күнүгэр (сэрэдэҕэ) сарсыарда “Саха” НКИХ “Саҥа күн” биэриитигэр быһа сибээскэ тахсыаҕа. Онтон 10-12 чааска диэри Дьокуускайдааҕы потребительскэй кооперация торговай-экэнэмическэй кэллиэһигэр анал үөрэх тэрилтэлэрин устудьуоннарын кытта көрсүөҕэ. Салгыы 14-16 чааска “Кванториумҥа” оскуола үөрэнээччилэрин кытта кэпсэтиэҕэ, пресс-кэмпириэнсийэ биэриэҕэ.
Сэтинньи 9 күнүгэр (чэппиэргэ) 15-17 чааска “7 халлаан” эрэстэрээҥҥэ анал үөрэх тэрилтэлэрин устудьуоннарыгар, преподавателлэригэр, аска сыһыаннаах тэрилтэлэр бэрэстэбиитэллэригэр анаан маастар-кылаас көрдөрүөҕэ.
Сэтинньи 10 күнүгэр (бээтинсэҕэ) 12 чаастан 2-с нүөмэрдээх Бырабыыталыстыба дьиэтин Улахан саалатыгар Абу-Даби куоракка ВорлдСкиллс (WorldSkills) аан дойдутааҕы чөмпүйэнээтигэр ситиһиилээхтик кыттыытын түмүгүнэн, Степан Кириллини чиэстиир үөрүүлээх тэрээһин буолуоҕа.
Людмила ПОПОВА, “Саха сирэ”, edersaas.ru