Бүгүҥҥү брифинг кэмигэр СӨ доруобуйатын харыстабылын миниистирэ Лена Афанасьева иһитиннэрбитинэн, өрөспүүбүлүкэҕэ бүтэһик сууккаҕа 116 киһи ыалдьыбытыттан — сүүрбэ түөрдэ оҕо.
Ол курдук, 92 улахан киһи ыалдьыбыт эбит буоллаҕына, итинтэн 90 киһи быһыыны ылбатах. Мэдиссиинэ тэрилтэлэригэр, уопсайа, 803 киһи эмтэнэ сытарыттан, 68 ыарыһах ыарахан туруктаах, 16 киһи – реанимацияҕа.
Нерюнгри, Алдан, Хаҥалас, Сунтаар, Орто Халыма улуустарыгар суукка устата 5-9 киһи коронавирустаабыт.
Коронавирустан харыстанар быһыы туһунан эттэххэ, бүгүҥҥү туругунан өрөспүүбүлүкэ үрдүнэн 519 586 киһи бастакы компонены ылбыт. Бу улахан дьон 72,5 бырыһыаннара буоларын миниистир иһитиннэрдэ. Быһыы бастакы компоненын хото (90-тан үөһэ бырыһыан) Аллайыаха, Үөһээ Халыма, Муома, Аллараа Халыма, Орто Халыма улуустарын олохтоохторо ылбыттар. Абый, Эдьигээн, Ленскэй, Өлөөн улуустарын улахан саастаах дьонун 80-тан тахса бырыһыана быһыыны туруортарбыт. Дьокуускай куоракка быһыы бастакы компоненын ылбыт улахан дьон ахсаана 75,7 % тиийбит. Хомойуох иһин, Чурапчы улууһугар ити сыыппара 56,8 % тэҥнэһэр диэн миниистир бэлиэтээтэ.
“Саха сирэ” хаһыат, edersaas.ru
Хаартыска: zen.yandex.ru