Саха сирэ уһун кыһыннаах буолан, төрөппүттэр кылгас сайыны баттаһа оҕо сынньалаҥар улахан болҕомтолорун уураллар. СӨ Үөрэҕин уонна наукатын министиэристибэтэ иһитиннэрэринэн, быйылгы сылга, уопсайа, 661 сынньалаҥ уонна доруобуйаны бөҕөргөтөр лааҕыр үлэлиэҕэ.
edersaas.ru
Сыл устата лааҕырынан 63 050 оҕо хабыллыахтаах. Быйыл оҕо сынньалаҥар уонна доруобуйатын бөҕөргөтүүгэ хааһынаттан 549 315 тыһ. солк. үбүлээһин көрүллүбүт. Улахан аҥаарын (409 290 тыһ. солк.) судаарыстыба бүддьүөтэ уйунар. Сыллата 63 000 оҕо уопсай түмүллүбүт бүддьүөт суотугар сынньалаҥынан, доруобуйатын бөҕөргөтүүтүнэн хааччыллар. Ити оскуола саастаах оҕо 50,5 % тэҥнэһэр. Оттон өрөспүүбүлүкэ тас өттүгэр 5500 оҕо баран сынньанар (4 % тэҥнэһэр) эбит.
Саха сиригэр сылы эргиччи “Бэс Чагда” киин үлэлиир. Манна сыллата 3000 оҕону хабан 15 араас хайысхалаах симиэнэлэри тэрийэллэр. Күн бүгүн судаарыстыбаннай-чааһынай бииргэ үлэлэһии иитинэн “Хотугу сулус” оҕо сынньалаҥын киинин тутуутугар үлэ барар.
Сыыппаралар
500 күнүскү
41 куорат таһынааҕы стационарнай
1 санаторнай-бөҕөргөтөр
52 үлэ уонна сынньалаҥ
67 балааккалаах лааҕыр үлэлиэхтээх
“Саха сирэ” хаһыат, edersaas.ru