Тохсунньу 25 күнүттэн 31 күнүгэр диэри санитарнай-гигиеническэй ирдэбиллэри төһө тутуһалларын бэрэбиэркэлээн, атыы-тутуу, аһылык уонна култуура эбийиэктэригэр барыта 636 рейдэ оҥоһулунна. Маннык бэрэбиэркэлэри Дьокуускай куоракка, Алдаҥҥа, Булуҥҥа, Үөһээ Бүлүүгэ, Бүлүүгэ, Кэбээйигэ, Мииринэйгэ, Өймөкөөҥҥө, Өлүөхүмэҕэ, Орто Халымаҕа, Тааттаҕа, Уус Алдаҥҥа, Уус Маайаҕа, Хаҥаласка ыыттылар.
edersaas.ru
Бу туһунан, тохсунньу 31 күнүгэр, Бырабыыталыстыба Бэрэссэдээтэлин солбуйааччы Михаил Никифоров иһитиннэрдэ. Рейдэлэр түмүктэринэн, 32 аакта толорулунна, түөрт быһаарыы, аҕыс сэрэтии, 18 дьаһал, административнай кэһиигэ 59 боротокуол толорулунна. Суут көрүүтүгэр 48 дьыала ыытылынна. 305 профилактическай бэсиэдэ оҥоһулунна.
Рейдэни таһынан, өрөспүүбүлүкэҕэ Дьокуускай куорат коронавируһу утары охсуһар суһал ыстаабын түмсүүтэ, СӨ Урбаан министиэристибэтэ, СӨ Роспотребназдор управлениета кыттыылаах 461 бэрэбиэркэ оҥоһулунна. Ол иһигэр, 375 атыы-тутуу, 70 ас-үөл, 16 бытовой өҥөнү оҥорор эбийиэктэри көрдүлэр. Түмүккэ икки аакта толорулунна, икки быһаарыы, 8 сэрэтии, 18 дьаһал, 239 сэрэтэр кэпсэтии оҥоһулунна.
СӨ Ил Дарханын уонна Бырабыыталыстыбатын пресс-сулууспата.
Хаартыска: Мария Васильева, СИА