Былырыын алтынньы 1 күнүттэн Уһук Илиҥҥэ «босхо гектары» биэриини сүрүннүүр федеральнай сокуон иккис, оттон 2017 сыл олунньутуттан үһүс түһүмэҕэ киирэн, Арассыыйа бары олохтоохторо Уһук Илин эрэгийиэннэриттэн биир гектар сири ылар кыахтаммыттара.
edersaas.ru
Сир ылааччылар бастаан судаарыстыбаннай өҥөлөр порталларыгар (gosuslugi.ru) регистрацияланан баран, салгыы Надальнийвосток.рф сайтка киирэн сайаапкаларын түһэрбиттэрэ. Бу күннэргэ СӨ Баай-дуол уонна сир сыһыаннаһыыларыгар министиэристибэтэ, босхо сир ылбыт дьону булан кэпсэппитин, эһиги ааҕыыгытыгар таһаарабыт.
Артем Леонтьев, Хаҥалас улууһун Күөрдэмигэр 2 гектар сирдээх:
– «Уһук Илин гектар» бырайыак туһунан олохтоох көрдөрөр-иһитиннэрэр ситимнэртэн билэн, тута сайаапка биэрэргэ санаммытым. Сайаапка биэриэхпиттэн саҕалаан, дуогабар түһэрсиэхпэр диэри, оруобуна биир ый буолбута. Докумуон толотторууга улахан харгыстары көрсүбэтэҕим. Кылаабынайа, куораттан чугас сири ылыахпын баҕарбытым. Өҥнөөх металлары переработкалааһынынан дьарыктанар, анал база туттар былааннаахпын.
Роман Филатов, кэргэнинээн 2 гектар сири Амма улууһуттан ылбыттар:
— Бу бырайыак туһунан сылы быһа кэпсэппиттэрэ. Онон, киһи барыта босхо сир ылар баҕалааҕа. Биһиги улуус киинигэр кыбартыыраҕа олоробут. Инньэ гынан, оҕуруот аһылыгын, араас үүнээйини олордорго учаастак хайаан да наада. Кэргэмминээн уруккуттан Булун сэлиэнньэтиттэн учаастак ылыахпытын баҕарар этибит. Дьолго, «Уһук Илин гектар» бырагыраама олоххо киирэн, биһиги ыра санаабыт туолла. Докумуон толотторуута үгүс бириэмэни ылбата диэххэ сөп. Арай, бастаан сайаапка биэрбиппитигэр икки нэдиэлэнэн аккаас кэлбитэ. Учаастакпыт атын хаһаайыннаах этэ. Онон, кыраныыссаларын арыый сыҕарытан биэрэн, хос сайаапка түһэрбиппит. Үс нэдиэлэнэн номнуо дуогабарга илии баттаабыппыт. Булун сэлиэнньэтин территориятыгар 53 учаастак бэриллибит. Батсаапка сирдээх дьон анал бөлөх тэрийэн, бары бэйэ-бэйэбитин кытары билистибит. Учаастакпытыгар хортуоппуй олордуохпут уонна тэпилииссэ тутуохпут.
Руслан Бурцев, Уус Алдан Курбуһаҕыгар сирдээх:
– Мин сылгы иитиитинэн дьарыктанабын. Онон сирбэр сылгы базатын тутар былааннаахпын. Оруобуна дьоҕус дьиэ туттубут сирбэр учаастак оҥотторбутум. Кэлэр сылга баанньык, гараж туттар былааннаахпын. 2017 сыллаахха сылгы базатын тутууга 1 мөл. солк. грант ылбытым. Онон 2018 сыл балаҕан ыйыгар диэри тутуу түмүктэниэхтээх.
Егор Константинов, Амма Эмиһигэр 5 гектар сири ылбыт:
—Сылгы, сүөһү иитиитинэн дьарыктанабын. «Уһук Илин гектар» бырагыраама туһунан билэр дьоммуттан истэн сайаапка биэрбитим. 2017 сыллаахха 2 мөл. солк. суумалаах грант ылбытым. Онон «Уһук Илин гектартан» 5 гектар уонна «Саха сирэ гектара» бырайыактан 100 гектары оҥотторбутум. Сүөһү ахсаанын элбэтэр былааннаахпын.
Виктор Витеско, Мирнэй Айхалыгар 1 гектар сири оҥотторбут:
— Бу бырайыак олоххо киирээтин кытары тута сайабылыанньа биэрбитим. Уруккуттан бэйэ дьыалатын тэриниэхпин баҕарар этим. Тута «Надальнийвосток.рф» сайтка сайабылыанньа түһэрэн, табыгастаах учаастагы талбытым. Номнуо учаастакпар 120 кв миэтэрэлээх тэпилииссэ тутуннум. Билигин уот, уу боппуруоһун быһаарса сылдьабыт.
Бэйэбит инф., «Эдэр саас» сайт