“60 сыл – 60 хонук курдук, биирдэ элэс гынан ааста…”, — диир Дьокуускай куорат кырдьаҕас олохтооҕо Василий Федоров.

Быйыл тапталлаах куораппыт Дьокуускай 385 сылын туолла. Үбүлүөйдээтибит. Оттон ханнык баҕарар куораты —кырдьаҕас да буоллун, эдэр да буоллун — биллэн турар, кини олохтоохторо киэргэтэллэр, баай, дириҥ ис хоһооннууллар.

Ол курдук, куораттарын үбүлүөйдээх сылыгар бэйэлэрин тус үбүлүөйдэрин сэмэйдик бэлиэтээбит дьоннор эмиэ бааллар. Холобур – Федоровтар дьиэ кэргэттэрэ. Бу дьоһуннаах, кыраһыабай  паара быйыл ыал буолан, “бур-бур” буруо таһааран, оҕо төрөтөн, үлэлээн-хамсаан, дьоллоохтук олорбутун 60 сылын бэлиэтээтэ.

Эһиги бу, куорат “Аппа уҥуоругар”  Ю.Стеклов аатынан уулуссаҕа 1N-дээх эргэ мас дьиэлэригэр өрдөөҕүттэн олорор ыалларын бэркэ диэн билэр буолан, фотосуруналыыс Петр Оконешников хаартыскаҕа түһэрбитин көрөҕүт.

Ыал аҕата, эһэтэ Василий Павлович Федоров 83 саастаах, үлэ, тыыл бэтэрээнэ, Мэҥэ-Хаҥалас улууһун I Хаптаҕай нэһилиэгин киһитэ.

—Икки Үлэ Дьоруойа – аатырбыт биригэдьиир, агроном Екатерина Иннокентьевна Новгородова уонна биллиилээх агротехник-оҕуруоччут Гаврил Семенович Самсонов дойдуларыттан Хаптаҕайтан төрүттээхпин. Гражданскай сэрии Дьоруойа Кеша Алексеев эмиэ биһиги дойдубут.., — диэн бэтэрээн биллиилээх биир дойдулаахтарынан киэн туттуон-туттар.

Оттон Василий Павловиһы бэйэтин эмиэ үлэни үлэлээбит киһи дии санаатым. Дьокуускайдааҕы кооперативнай техникуму ревизор-бухгалтер идэлээх үөрэнэн бүтэриэҕиттэн, 1961 сылтан райпоҕа үлэлээбитэ – бухгалтер, сельпо, райпо солбуйааччы бэрэссэдээтэлэ, райпо бэрэссэдээтэлэ, 1981 сылтан хоту Булуҥҥа атыы-эргиэн тэрилтэтин дириэктэрэ, онтон пенсияҕэ барыар диэри Дьокуускайга Хотугу сир физико-техническэй проблемаларын институтугар хааччыйыы салаатын сэбиэдиссэйинэн үлэлээбитэ.

Алта уон сыл устата эн-мин дэһэн иллээхтик олорор кэргэнинээн Евдокия Семеновналыын Хаптаҕай оскуолатыгар 5-с кылаастан бииргэ үөрэммиттэр эбит.

Евдокия Семеновна Терентьева–үрдүк кылаастаах, уран тарбахтаах иистэнньэҥ, таҥас быһааччы, үлэ, тыыл бэтэрээнэ.  Үгүс киһи махталын ылбыт маастар. Икки уоллаахтар (үһүттэн биирдэрин сүтэрбиттэр), элбэх сиэннээхтэр, хос сиэннээхтэр.

Василий Павлович Федоров үлэ, олох араас ымпыгын-чымпыгын  өйүнэн-санаатынан, этинэн хаанынан билбит киһи буолар. Онон:

— Хайа баҕарар кэмҥэ үлэ — киһи дьоло. Биһиги  көлүөнэ үйэбит тухары үлэнэн дьолломмуппут. Кырдьыгынан, чиэһинэйдик олоруохха, үлэлиэххэ. Онтон ордук дьол суох дии саныыбын. Чахчы, биһиги билигин отой атын кэмҥэ олоробут. Күннээҕи олохпутугар бэрээдэк мөлтөх, дьиссипилиинэ кэһиллэр, бэйэмсэх буолуу бүрүүкээбит курдук, кырдьаҕастарга болҕомто ситэ тиийбэт дии саныыбын. Аҥардас кыра биэнсийэҕэ олорорго ыарахан. Салалта өттүттэн балаһыанньаны дириҥник өйдөөн, көдьүүстээх дьайыыны оҥороллоро наада… Биһиги аҕа көлүөнэ билигин, сиэннэрбит, хос сиэннэрбит үчүгэй олоххо олордоллор, диэн баҕа санаалаахпыт. Уонна эдэрдэргэ туһаайан этэбин – ийэ тылгытын умнумаҥ, харыстааҥ, сайыннарыҥ, оҕолоргутун сахалыы кукка иитиҥ-такайыҥ.., — диэн, ыччаттарга  сүбэтэ-амата элбэх.

Татьяна МАРКОВА.

Петр ОКОНЕШНИКОВ хаартыскаҕа түһэриилэрэ.