«МегаФон» ПАУо Арассыыйа сибээһин бөдөҥ хампаанньаларын кытары бэһис көлүөнэ мобильнай ситимин (5G/IMT-2020) сайыннарыыга бииргэ үлэлээһиҥҥэ сөбүлэһии түһэристилэр. Сөбүлэһиигэ олоҕуран, “МегаФон” суотабай сибээс оператора “Ростелеком”, “ВымпелКом” уонна МТС хампаанньалары кытары холбоһуктаах тэрилтэлэри тэрийэн, Арассыыйаҕа 5G/IMT-2020 ситими сайыннарыыга бары күүстэрин ууруохтара.
edersaas.ru
5G: өйдөөх тэриллэр, цифровой куораттар
Урукку өттүгэр 2G, 3G ситиминэн эрэ туһанар буоллахпытына, билигин Арассыыйа үгүс нэһилиэнньэлээх пууннарыгар түргэн сырыылаах 4G киирдэ.
«МегаФон» суотабай сибээс оператора өрөспүүбүлүкэ хас да куоратыгар уонна бөһүөлэктэригэр сибээс хаачыстыбатын тупсаран, 4G мобильнай интэриниэтинэн туһанааччылар ахсааннара элбии турар. Аны билигин туһааннаах хампаанньа Арассыыйаҕа бастакытынан 5G ситими киллэрэн, мобильнай сибээс саҥа таһымҥа тахсан эрэр.
Онтон бу ситимнэр бэйэ-бэйэлэриттэн туох уратылаахтарый?
5G — бэһис көлүөнэ мобильнай сибээһэ (fifth generation). Мобильнай сибээһинэн дааннайдары ыытыы (мобильные передачи данных) быдан түргэн, сигнал баара-суоҕа 1-2 сөкүүндэнэн эрэ бытаарыан сөп. 4G маннык түргэн буолбатах. Холобур, сөмөлүөтүнэн ханна эрэ көтөөрү сылдьаҥҥыт, баара-суоҕа аҕыйах мүнүүтэ иһигэр дьон кутун туппут “Игра престолов” киинэ бары сезоннарын хачайдыаххытын сөп.
Арассыыйаҕа аан бастакынан “МегаФон” хампаанньа бу сайын Санкт-Петербург куоракка ыыттыллыбыт аан дойдутааҕы экэнэмиичэскэй пуорум кэмигэр 5G ситиминэн бастакы видео-кэпсэтиини оҥорбуттара.
Телемэдиссиинэ
Кэлиҥҥи сылларга аан дойду үрдүнэн телемэдиссиинэ сайдан, биһиги өрөспүүбүлүкэбитигэр Мэдиссиинэ национальнай киинигэр эмиэ хото туһанан эрэллэр. Онон түргэн интэриниэттээх оройуоннар быраастара, киин эрэгийиэннэр институттарын, килииникэлэрин эмчиттэрин, исписэлиистэрин кытары быһа сибээскэ тахсан, онлайн сүбэ-ама ылаллар. Оннооҕор ыарахан эпэрээссийэлэри оҥорор кыахтаннылар. Инникитин 5G ситимҥэ холбонон, ыраахтан олорон ультразвуковой диагностика оҥоруохха сөбүн “МегаФон” исписэлиистэрэ этэллэр.
«Өйдөөх тэриллэр»
Билигин “өйдөөх тэриллэр” дьиэҕэ турба тэстэн, уу таммалаатаҕына, тута дьиэлээх хаһаайын төлөпүөнүгэр иһитиннэрии ыытан, кыраан уутун сабар, итиэннэ Салайар хампаанньаҕа тыллыыр кыахтаахтар. “Өйдөөх тэриллэр” иһитиннэриини тута биллэрэллэрин курдук, сибээс түргэн буолуохтаах. Онон 5G ситим “өйдөөх куораттары” сайыннарыыга ордук туһалаах уонна көдьүүстээх буолуоҕун этэллэр.
Бэлэмнээтэ Анивера Акимова, edersaas.ru
Хаартыска интэриниэттэн туһанылынна.