Кыстыгы көрсө өрөспүүбүлүкэ үрдүнэн 471 тыһыынча 495 туонна от, 16 тыһыынча 112 туонна сенаж итиэннэ 25 тыһыынча 567 туонна сиилэс бэлэмнэниэхтээх.
edersaas.ru
Бас билии көрүҥүттэн тутулуга суох, өрөспүүбүлүкэ үрдүнэн, от ыйын 25 күннээҕи чахчынан, 88 675 гектар ходуһа ото охсулунна, 56 809 туонна от кэбиһилиннэ. Ити былаан 12 %-на уонна былырыыҥҥы сыл туһааннаах кэмин кытары тэҥнээтэххэ, 12 726 туоннанан аҕыйах. Билигин ходуһаларга 26 тыһыынча отчут, 1 335 толору мэхэньисээссийэлэммит, 3 908 ситэтэ суох мэхэньисээссийэлэммит, 242 көлө-илии, 1 996 илии звенолара үлэлии-хамсыы сылдьаллар.
Ыам ыйыттан саҕалаан, от ыйын бастакы аҥаарыгар диэри ардаабатаҕа алаас сирдээх улуустарга окко уонна бурдукка охсуулаах буолла. Ол эрээри, сүөһү аһылыгын соҕотуопкатын иилиир-саҕалыыр өрөспүүбүлүкэтээҕи ыстаап уонна улуустар дьаһалталара үлэни-хамнаһы сөптөөхтүк тэрийбиттэрин түмүгэр, улуустар олохтоохторо: “От суох, сутаатыбыт”, – диэн аймалҕаны таһаарбакка, туох сэрбэйбитин сирийэн, салааны да хаалларбат туһугар үлүмнэһэн оттуу сылдьаллар.
Раиса Сибирякова, «Саха сирэ» хаһыат, edersaas.ru