Муус устар 2 күнүттэн Бүтүн Арассыыйатааҕы сыллата ыытыллар бэрэбиэркэлиир үлэлэр саҕаланнылар. Быйыл дойду үрдүнэн 5 мөлүйүөнтэн, Саха сиригэр 55 тыһыынчаттан тахса оскуола үөрэнээччитэ хабыллыаҕа диэн этэллэр.
edersaas.ru
Бүтүн Арассыыйатааҕы бэрэбиэркэлиир үлэҕэ 4-с, 5-с, 6-с, 7-с уонна 11-с кылаас оҕолоро хабыллаллар. Бу биирдиилээн биридимиэттэринэн хонтуруолунай үлэ быһыытынан ааһар, 2016 сыллаахха киирбитэ. Биир кэлим эксээмэн курдук чопчу күҥҥэ ыытыллар. Ол эрээри, биир кэлим эксээмэн (ЕГЭ) буолбатах. Манан үөрэнээччи федеральнай судаарыстыбаннай үөрэх ыстандаардын ирдэбилин хайдах ылынарын бэрэбиэркэлииллэр. Аттестат ыларга, кылааһы тахсарга хайдах даҕаны дьайбат.
11-с кылаас үөрэнээччилэрэ талбыт эксээмэннэриттэн ураты биридимиэттэргэ туттараллар. Быйылгы сыл сүрүн уратытынан, 4-c кылаас оҕолоро көрүллүбүт нэдиэлэҕэ биир күнү талан туттараллар. Ханнык күнү таларын оскуола бэйэтэ быһаарар.
Бэрэбиэркэлиир үлэ 7-с кылаас үөрэнээччилэрэ англия тылын, 11-с кылаас үөрэнээччилэрэ история биридимиэтин туттарыыларыттан саҕаланна. Онтон бүгүн 7-с кылаас үөрэнээччилэрэ обществознаниены, 11-с кылаастар биологияны туттардылар. Ити курдук, ыйыллыбыт күннэринэн муус устар 26 күнүгэр диэри ыытыллыаҕа.
Сорудаҕа барыта сыллааҕы барбыт тиэмэлэртэн бэриллэр, онон долгуйарга төрүөт суох диэн тэрийээччилэр бэлиэтииллэр.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.