РФ бэрэсидьиэнин сорудаҕынан, бырабыыталыстыба суһал көмө массыыналарын пааркатын саҥардыыга уонна оскуола оптуобустарын атыылаһыыга үлэтин салгыыр. Сотору кэминэн Арассыыйа бары эрэгийиэннэригэр 6 тыһыынча кэриҥэ массыына кэлиэҕэ. Массыыналары субъектарынан тыырыы туһунан дьаһалга премьер-миниистир Михаил Мишустин илии баттаабытын туһунан ЦУР иһитиннэрдэ.
Саха сиригэр 51 оскуола оптуобуһа уонна 18 суһал көмө массыыната кэлиэҕэ. Ол курдук эрэгийиэннэргэ «Автомобильный завод «ГАЗ» ХЭУо, «УАЗ» ХЭУо уонна да атын собуоттарыгар оҥоһуллубут массыыналар түҥэтиллиэхтэрэ.
«Суһал көмө массыыналара оройуоннарга түҥэтиллэн, ыраах сытар нэһилиэнньэлээх пууннартан ыарыһахтары аҕалыыга улахан көмө буолуоҕа», — диэн Дьокуускайдааҕы суһал көмө станциятын кылаабынай бырааһа Татьяна Андросова иһитиннэрдэ.
Арассыыйа эрэгийиэннэригэр барыта 1624 суһал көмө массыыната уонна 4187 оскуола оптуобуһа түҥэтиллиэҕэ.
edersaas.ru