Дьиэттэн олорон үөрэх уонна 50% тэйиччиттэн үлэҕэ көһүү туһунан

Вице-премьер коронавирус сыстыганнаах дьаҥын тарҕаппат, бохсор туһуттан, тэрилтэлэргэ санитарнай-эпидемиологическай хонтуруолу булгуччу тутуһуу ирдэнэрин бэлиэтээтэ. Маныаха коронавируһу утары санитарнай ирдэбили күүһүрдэр туһуттан тэрилтэҕэ 50 % тэйиччиттэн үлэ эрэсиимигэр көһөрө этиллэр. Итиннэ Ольга Балабкина быһыыны ылбатах 60- саастарын ааспыттар, медотводтаах, дьарҕарбыт ыарыылаахтар ыраахтан олорон үлэлиэхтээхтэрин санатта.

Ольга Балабкина, маны сэргэ, бүгүҥҥүттэн Дьокуускай куоракка 9 уонна 11 кылаас үөрэнээччилэриттэн ураты атын кылаастарга дистанционнай үөрэх киирбитин эттэ.

«Оскуола оҕолоро ыраахтан олорон үөрэнэллэринэн сибээстээн, кинилэри хонтуруоллуур сыалтан, үлэ биэрээччилэр дистанционнай көрүҥүнэн үөрэнэр оҕолоох төрөппүттэртэн биирдэстэрин тэйиччиттэн үлэҕэ көһөрүөхтэрэ«, — диэтэ кини.

Вице-премьер бары поликлиникаларга биир кэлим «122» нүөмэр үлэлиирин ыйда. Ону сэргэ бүгүҥҥүттэн поликлиникалар суукканы эргиччи эрэсиимҥэ көһөллөрүн эттэ.

СӨ Роспотребнадзор управлениетын чахчытынан, Саха сиригэр кэнники хонукка 313 киһи коронавирустаабыт, ол иһигэр 102 оҕо ыалдьыбыт. Маныаха Ольга Балабкина коронавируһу утары быһыыны ылбатах дьон ыараханнык ыалдьалларын уонна балыыһаларга киирэллэрин этэр. Кэнники хонукка ыалдьыбыт 211 улахан киһиттэн быһыыны ылбатаҕа — 205. Стационардарга 665 ыарыһах сытар. 606 киһи туруга орто. Ыараханнык ыалдьыбыт 53 киһиттэн 52-тэ быһыыны ылбатах.

Өрөспүүбүлүкэтээҕи суһал ыстаап Дьокуускай куораты, Хаҥалаһы, Мэҥэ Хаҥалас уонна Горнай улуустарын күннэтэ хонтуруолга тутар. «Бу улуустар суһал ыстааптара кэккэ хааччахтыыр миэрэлэри киллэрэллэригэр сорук туруорулунна«, — диэтэ кини.

Өрөспүүбүлүкэҕэ быһыыны биэрии хампаанньата салҕанар. Тохсунньу 18 күнүнээҕи туругунан коронавируһу утары быһыы бастакы компоненын нэһилиэнньэ улахан дьонун 76 %-на ылбыт.

Андрей Сорокин (СИА) хаартыскаҕа түһэриитэ