Ахсынньы 27 күнүгэр Москуба куорат бириэмэтинэн 5 чаас 07 мүнүүтэҕэ халлаан куйаарыгар «Илин» космодромтан «Союз-2.1 а» аракыата көтүөҕэ. Сүрүн сыала-соруга – сиргэ суоһуур ыксаллаах быһыыны-майгыны, айылҕа алдьархайын, соһуччу техногеннай уонна гидрометеорологическай куттал баарын-суоҕун чинчийии.
Санатан эттэххэ, «Илин» космодром өрөспүүбүлүкэни кытта ыаллаһа сытар Амурскай уобаласка баар. Роскосмос хампаанньа сэрэтэринэн, аракыата Сахабыт сирин үрдүнэн көтөн ааһыа, ол тобохторо Бүлүү, сороҕо Үөһээ Бүлүү, Эдьигээн улуустарыгар, Өлүөхүмэ уонна Алдан оройуоннарыгар түһүөхтэрэ.
Көтөр аал тобохторун көрдүүргэ, нэһилиэктэргэ куттала суох балаһыанньаны хааччыйарга, тулалыыр эйгэ туругун кэтээн көрөргө СӨ Бырабыыталыстыбатын бэрэссэдээтэлин солбуйааччы Денис Белозеров салалталаах сүбэ мунньах буолла. Дьон олоҕор, хаһаайыстыбатыгар аракыата тобохторо кутталы үөскэппэттэрин туһугар бэлэм олоруохтара.
Марианна Тыртыкова, «Саха сирэ», edersaas.ru