Быйыл САССР төрүттэммитэ 100 сылыгар биллэр олоҥхоһуттар Иннокентий Теплоухов-Тимофеев, Алексей Агапов, Иоаким Избеков ааспыт үйэ 40-с сылларыгар суруллубут олоҥхолорун Национальнай архыып саайтыгар таһаарыахтара.
“Төлөн хара аттаах Төрүөт Бэргэн”, “Куруубай хааннаах Кулун Куллустуур”, “Эрэйдээх-буруйдаах Эр Соҕотох”, “Оҕо улуу Ньургун Бухатыыр” олоҥхолору ким баҕалаах киирэн ааҕар кыахтаныа. Бу туһунан Национальнай архыып дириэктэрэ Петр Румянцев этэр.
Арассыыйа норуоттарын култуурунай нэһилиэстибэлэрин сылыгар норуот тылынан уус-уран айымньыларын сыыппараҕа көһөрөн, үүнэр көлүөнэлэргэ хаалларар уонна дьон киэҥ туһаныытыгар таһаарар соругу Ил Дархан туруорбута. Онон архыып саайтыгар бу биэс олоҥхоттон ураты, Былатыан Ойуунускай “Туйаарыма Куо” олоҥхотун эмиэ таһаарыахтара.
Ону тэҥэ, Саха АССР төрүттэниитин туһунан архыып докумуоннарын сыыппараҕа көһөрүөхтэрэ.
Улуу Кыайыы 75 сылыгар өрөспүүбүлүкэтээҕи военкоматтар архыыптара сыыппараҕа көһөрүллүбүттэрэ. Бу докумуоннары архыып саайтыгар уонна “Элар-Архив” информационнай систиэмэ нөҥүө көрүөххэ сөп. Ол курдук, 60 тыһыынчаттан тахса сэрии кыттыылааҕын, “За доблестный труд в Великой Отечественной войне 1941-1945 гг.” мэтээлинэн наҕараадаламмыт 48 тыһыынча тыыл үлэһиттэрин туһунан дааннайдары булуохха сөп.
Национальнай архыып дьон төрүччүтүн туһунан таҥара дьиэлэрин миэтирикэлэрин, ыраахтааҕы саҕанааҕы нэһилиэнньэ биэрэпиһин докумуоннарын сыыппараҕа көһөрүүгэ удахан үлэни ыытар. Билигин архыыпка 1,4 мөлүйүөн кэриҥэ историческай докумуон хараллан сытар.
Ангелина Васильева, “Саха сирэ” хаһыат, edersaas.ru