РФ Роспотребнадзорун дьаһалтатын салайааччытын солбуйааччы Изабелла Самойлова брифинигэр : «Бүтэһик үс нэдиэлэҕэ Саха сиригэр коронавирус дьаҥа элбээбитэ бигэргэннэ. Ону кытта ситимнээн уонна нэһилиэнньэҕэ саас аайы бэлиэтэнэр тымныйыы, дьаҥ элбээбитинэн сибээстээн, Өрөспүүбүлүкэ сүрүн санитарнай бырааһа Саха сирин оскуолаларыгар 5-8 кылаас үөрэнээччилэрин ыраахтан олорон үөрэтэргэ, ону тэҥэ эбии үөрэхтээһини уонна бөлөҕүнэн үҥкүү, спорт дьарыктарын тохтотор туһунан этиини киллэрбитэ».
Эрдэ биллибитинэн, Саха сирин үөрэхтээһинин уонна наукатын министиэристибэтэ «Дьокуускай куорат үөрэҕириитин кыһаларыгар COVID-19 дьаҥыттан харыстанар уонна дьаҥ тарҕаныытын тохтотор миэрэлэри ылыныы туһунан» бирикээһи бэлэмнээбит. Онно ыйылларынан, коронавирус дьаҥынан ыалдьыбыт дьон ахсаана күннэтэ үксүү турарынан, Дьокуускай оскуолаларын 5-8 кылаас үөрэнээччилэрин муус устар 23 күнүттэн ыам ыйын 8 күнүгэр диэри ыраахтан олорон үөрэниигэ көһөрөргө сүбэлиир. Бэйэни салайыы тэрилтэлэрэ бүгүҥҥү күн устата быһаарыныыны ылыныахтара.
Надежда Ильина.