Бүгүн, тохсунньу 18 күнүгэр, Бүлүү, Үөһээ Бүлүү, Ньурба улууһун олохтоохторо 4G суотабай сибээскэ уонна оптика түргэн тэтимнээх аан дойду ситимигэр холбоннулар. «Ростелеком» хампаанньа «Бүлүү экспреһэ» диэн бырайыагы баара-суоҕа аҕыс эрэ ый иһигэр 650 км ситими тардан олоххо киллэрдэ.
edersaas.ru
Ил Дархан Айсен Николаев: «Күн бүгүн өрөспүүбүлүкэ нэһилиэнньэтин 79 бырыһыана түргэн интэриниэтинэн хааччылынна. Онон Бүлүү бөлөх улуустара аныгы IT-бырайыакка кыттыһар, телемедицина өҥөтүн туһанар, урбааны сайыннарар кыахтаннылар», — диэн эттэ.
Сахабыт сиригэр билиҥҥитэ 157 нэһилиэк оптикаҕа холбонно эрээри, үлэ манан тохтоон хаалбат. Сотору кэминэн Ньурба улууһун бары нэһилиэктэригэр, Сунтаарга түргэн интэриниэт тиийиэҕэ.
Инновация, цифровой сайдыы уонна инфокоммуникационнай технология миниистирэ Анатолий Семенов Бүлүүгэ тиийэн, сибээһи тургутан көрбүтүнэн, «Instagram»-ҥа быһа сибээс холкутук ыытыахха сөп, видео харбакка үчүгэйдик көстөрүн иһитиннэрдэ.
Марианна Тыртыкова, «Саха сирэ», edersaas.ru