Олунньу 17 күнүнээҕи туругунан, өрөспүүбүлүкэҕэ коронавируһу утары быһыы үһүс бөлөҕө кэллэ. Урут кэлбит быһыыны аахсыбакка туран, билигин 49 412 устуука быһыы кэлэн, улуустарга тарҕатылларга бэлэм.
Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, билигин ыраах сытар, саас суола-ииһэ суох буолан хаалар нэһилиэнньэлээх пууннарга тиэрдэр сорук бастакынан турар. Ону тэҥэ, аҕам саастаах дьоҥҥо бастакы уочарат биэриэхтэрэ.
Билиҥҥи туругунан, өрөспүүбүлүкэҕэ 27 540 киһи саҥа коронавируснай инфекцияны утары быһыыны ылла. Үгүстэр иккис укуолларын ылан эрэллэр. Быһыыны ылан баран, ыараханнык ыалдьыбыт киһи суох. Суукка иһигэр 1000 киһи быһыыны ылар кыахтаах.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн