473 выпускник кыһыл көмүс мэтээллээх бүтэриэҕэ

Бөлөххө киир:

Сабаҕалааһын быһыытынан, өрөспүүбүлүкэ үрдүнэн орто оскуоланы бүтэрбит 473 выпускник кыһыл көмүс мэтээли ылыан сөп. Английскай тылга уонна информатикаҕа БКЭ түмүктэрэ от ыйын 4 күнүгэр биллиэхтэрэ, ол кэнниттэн бу сыыппара өссө  чопчуланыаҕа.

Үгэс курдук, Өрөспүүбүлүкэтээҕи лиссиэй-интэринээт саамай элбэх кыһыл көмүс мэтээллээх. 6 кылааска 139 оҕо бүтэрбититтэн, 35 оҕо “туйгун” үөрэхтээх. Норуоттар икки ардыларынааҕы Арктика оскуолатын (МАШ) бастакы выпуһугар — 17, Мииринэй, Нерюнгри оройуоннарыгар 27-лии кыһыл көмүс мэтээли ылбыт оҕолоохтор.

Дьокуускай куоракка 141 оҕо кыһыл көмүс мэтээли ылыан сөп. Арктика улуустарыттан Дьааҥыга 4 оҕо ылара – бу дьоһун ситиһии.

2022 сылга кыһыл көмүс мэтээли ыларга 10-с, 11-с кылаастарга наар туйгуннук үөрэниини таһынан, математикаҕа уонна нуучча тылыгар Биир кэлим эксээмэҥҥэ 70 баалтан намыһаҕа суох көрдөрүүлээх буолуохтаахтар. Быйыл БКЭ-ҕэ уларыйыылар киирэннэр, ыараан биэрэн, ол оҕолор көрдөрүүлэригэр эмиэ дьайбыт буолуон сөп.

Быйыл өрөспүүбүлүкэ орто оскуолаларын 7,9 тыһыынча оҕо бүтэрдэ.

Ил Дархан Айсен Николаев выпускниктар ситиһиилэрэ, ханнык да улууска, ханнык да оскуолаҕа буоллун, үөрэтии үрдүк таһымнааҕын көрдөрөр диэн бэлиэтээтэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

+1
0
+1
0
+1
0
+1
0
+1
0
+1
0
+1
0