45 тыһыынча оҕо 1,2 миллиард солкуобайы ылыаҕа
Олох-дьаһах - Саха ыала

45 тыһыынча оҕо 1,2 миллиард солкуобайы ылыаҕа

Саха сиригэр 3-7 саастаах оҕолорго ыйдааҕы төлөбүрдэргэ 1,2 миллиард солкуобай федеральнай бүддьүөттэн тыырыллан кэлиэҕэ. Ол туһунан уураахха РФ бырабыыталыстыбатын бэрэссэдээтэлэ Михаил Мишустин илии баттаата.

Өрөспүүбүлүкэҕэ бу төлөбүрү ылар бырааптаах оҕо ахсаана эбилиннэ. Билигин 45 тыһыынча оҕо ылар кыахтаах. Ил Дархан Айсен Николаев көмөтүнэн, федеральнай киини кытары түргэнник, көдьүүстээхтик үлэлэһэн, маннык уустук кэмҥэ дьиэ кэргэттэргэ көмө харчыны ылары ситистибит. Билигин “Госуслуги” порталга электроннай сайабылыанньа эрэ биэриэххэ наада. Атын ыспыраапкалары социальнай көмүскэл уорганнара бэйэлэрэ хомуйаллар, — диэн үлэ, социальнай сайдыы миниистирэ Елена Волкова быһаарда.

Бу көмөнү 3-7 саастаах оҕолоох, кыаммат ыалларга биэрэллэр. Кээмэйэ: 1-кы зонаҕа – 10 274 солкуобай, 2-с зонаҕа – 8651 солкуобай. Дьиэ кэргэҥҥэ хас да оҕо сааһынан хапсар буоллаҕына, оҕо аайы биэрэллэр.

3-7 саастаах оҕолорго ыйдааҕы босуобуйа 2020 сыл тохсунньутуттан бэрэсидьиэн ыйааҕынан анаммыта. Төлөбүрү бэс ыйыттан төлөөн саҕалаабыттара. Ол эрээри, сайабылыанньаны кэмигэр биэрбит дьоҥҥо босуобуйаны хос ааҕан, тохсунньуттан мунньан биэрбиттэрэ. Саха сиригэр быйыл бу сыалга 5 миллиард солкуобай көрүллүбүтэ.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

6 + 3 =