Быйыл өрөспүүбүлүкэ үрдүнэн бас билии көрүҥүттэн тутулуга суох 57 421 туонна үүт соҕотуопкаланыахтаах.
Тыа хаһаайыстыбатын министиэристибэтин бу дьыл тохсунньу 21 күнүгэр таһаарбыт 36 №-дээх «Тыа хаһаайыстыбатын бородууксуйатыгар соҕотуопкалыыр сыана алын кээмэйин бигэргэтэр туһунан» бирикээһинэн, ыаммытынан үүт киилэтин, субсидияны киллэрэн туран, 60 солкуобайтан итэҕэһэ суох харчыга, оттон субсидияны аахпакка туран, 10 солкуобайтан итэҕэһэ суох харчыга тутарга сүбэ оҥоһуллубута.
Атырдьах ыйын 20 күнүнээҕи чахчынан, өрөспүүбүлүкэ үрдүнэн барыта 41 308 туонна үүт туттарыллан астанна. Ити сыллааҕы былаан 72,2 %-а буолар. Былырыын баччаларга 52 230 туонна үүт соҕотуопкаламмыта. Өлүөхүмэ улууһа 1 935 туонна үүтү тутан, былаанын 84 %, Сунтаар улууһа 4 069 туонна үүтү тутан, былаанын 78 % толорон инники күөҥҥэ иһэллэр. Атын улуустары көрдөххө, Хаҥалас 3 411 (76 %), Таатта 3 067 (74 %), Чурапчы 3 879 (73 %), Бүлүү 2 654 (71 %), Үөһээ Бүлүү 1964 (70 % ), Амма 2 793 (67 %), Нам 1 593 (66,5 %), Уус Алдан 1 785 (66,1 %), Ньурба 2 420 (64 %) туонна үүтү туппуттар. Хотугу улуустартан Дьааҥы 1079 туоннаны тутан, былаанын 56,6 % толорон иһэр.
Үүтү тутан астааһыҥҥа быйылгы сылга 2 млрд. 862 мөл. 500 тыһыынча солкуобай көрүллүбүтүттэн, улуустарга 2 млрд. 576 мөл. 250 тыһыынча солкуобай, ол эбэтэр 90 %-а тиэрдиллэн турар.
Раиса Сибирякова.