Быйыл от ыйын 8-15 күннэригэр Саха Өрөспүүбүлүкэтин Ил Дархана Егор Борисов көҕүлээһининэн, Дьокуускайга уонна Чапаев сэлиэнньэтигэр норуоттар икки ардыларынааҕы I интеллектуальнай оонньуулар ыытыллыахтара. Норуоттар икки ардыларынааҕы доҕордоһууну түстүүр тэрээһиҥҥэ Арассыыйа уонна тас дойду үөрэнээччилэрэ роботтары оҥорууга, “Туймаада” норуоттар икки ардыларынааҕы оонньууга, «IT- Хакатон» сыһыарыылары оҥорууга, 3D-моделированиеҕа уонна бырайыактары оҥорууга күрэхтэһиэхтэрэ.
Арассыыйаҕа Үтүө дьулуур сыла биллэриллибитинэн, волонтердар үлэлэрэ күөстүү оргуйар. Бу киэҥ хабааннаах тэрээһиҥҥэ Саха сирин 400 волонтера үлэлиэҕэ. Кинилэр оонньуу кыттыылаахтарыгар уонна бочуоттаах ыалдьыттарга хонор уонна аһыыр сирдэри ыйан биэриэхтэрэ, тэрээһин үлэтигэр төһүү күүс буолуохтара.
Норуоттар икки ардыларынааҕы интеллектуальнай оонньууга кыттааччылары уонна ыалдьыттары волонтердар тэрээһин саҕаланыаҕыттан бүтүөр диэри арыаллыахтара. Ол иһин, сүүмэрдээһини ааспыт эрэ волонтердар үлэҕэ тардыллыахтара. Волонтердары сүүмэрдээһин муус устар 18 күнүттэн ыам ыйын 15 күнүгэр диэри буолуоҕа.
Сэҥээрбиттэр аадырыска киирэн билсиэххитин сөп. 16 саастарын туолбут эрэ ыччаттар волонтер буолаллар. Ол гынан баран, Оонньуу кыттыылаахтарын уонна ыалдьыттарын арыаллааччы волонтердар 18 саастарын туолбут буолуохтаахтара ирдэнэр. Сүүмэрдээһини ааспыттар оонньуулар иннилэринэ анал үөрэтиини барыахтара. Бастатан туран, омук тылын билэр буолуохтаахтар. Ону сэргэ, эрдэттэн Саха сирин устуоруйатын, Үтүө дьулуур хамсааһынын төрүөтүн үөрэтиэхтэрэ, билиэхтэрэ, тренинг ыытыллыа, хамаандаҕа үлэлииргэ үөрэниэхтэрэ.
Айыллаан Винокуров, СӨ волонтердарын киинин дириэктэрэ:
— От ыйын 8-15 күннэригэр ыытыллар бастакы норуоттар икки ардыларынааҕы интеллектуальнай оонньууга 400 волонтер биэс араас хайысханан үлэлиэҕэ. Ол курдук, дэлэгээссийэлэри уонна бочуоттаах ыалдьыттары арыаллыахтара, оонньуу ыытыллар сиригэр, ыалдьыттар түһэр дьиэлэригэр уонна аһыыр сирдэргэ ыалдьыттарга көмөлөһүөхтэрэ. Талыллыбыт волонтердар анал үөрэх барыахтара. Волонтердарбыт таһаарыылаахтык үлэлээн Сахабыт сирин ааттатыахтара диэн бигэ эрэллээхпин.
Николай Попов, «Саха сирэ» хаһыат, edersaas.ru