Ахсынньы 26 күнүгэр РФ бырабыыталыстыбата мунньахтаан, регионнарга 21,5 млрд. солк. биэрэргэ быһаарда. Бу үп бастакы оҕолоро төрөөбүт дьиэ кэргэттэргэ бэриллиэхтээх. Бу РФ бэрэсидьиэнэ демографияны тупсарар миэрэлэриттэн биирдэстэрэ, быйыл олоххо саҥа киирэр.
edersaas.ru
Александр Михеев, СӨ үлэҕэ, социальнай сайдыыга миниистирэ:
—2018 сыл тохсунньу 1 күнүттэн дьиэ кэргэҥҥэ бастакынан төрөөбүт оҕолорго ый аайы төлөбүр олохтонно. Төлөбүр кээмэйэ өрөспүүбүлүкэҕэ ааспыт сыл 2-с кыбаарталыгар олохтоммут тиийинэн олоруу алын кээмэйигэр тэҥнэһэр. 2017 сыл 2-с кыбаарталыгар тиийинэн олоруу алын кээмэйэ оҕоҕо – бастакы зонаҕа 20 050 солк., иккис зонаҕа – 16637 солк. этэ. Онон эдэр ыаллар бу сууманы оҕо балтараатын туолуор диэри ый аайы ылаллар.
Бу аадырыстаммыт көмө дьиэ кэргэн төһө дохуоттааҕыттан көрөн бэриллэр. Биһиги барыллаан ааҕыыбытынан, өрөспүүбүлүкэҕэ 4 тыһыынча кэриҥэ ыал ылар кыахтаах.
Бу көмөнү саҥа оҕоломмут ыал барыта ылар диэн буолбатах. Дьиэ кэргэн хас биирдии чилиэнигэр тиксэринэн, үлэһит киһиэхэ тиийинэн олоруу алын кээмэйэ балтарааҕа төгүллэммитин саҕа дохуоттаах буоллахтарына. Бу кээмэйи эмиэ ааспыт сыл 2-с кыбаарталыгар олохтоммутунан ааҕаллар.
Ол эбэтэр, 2017 сыл 2-с кыбаарталыгар үлэһит киһиэхэ олохтоммут тиийинэн олоруу алын кээмэйэ: бастакы зонаҕа – 21 140 солк. (ону балтарааҕа төгүллээтэххэ – 31710 солк. буолар), иккис зонаҕа – 17 186 солк. (25 779 солк.). Дьиэ кэргэн хас биирдии чилиэнигэр тиксэр дохуот бу сууматтан кыра буоллаҕына, төлөбүрү ылар кыахтаахтар.
Сайабылыанньаны оҕо төрөөбүтүн кэннэ балтараа сыл устата биэриэххэ сөп. Алта ыйын ааһа илик буоллаҕына, төлөбүр оҕо төрөөбүт күнүттэн ааҕыллан бэриллэр. Алта ыйын ааспыт буоллаҕына, сайабылыанньа бэриллибит күнүттэн ааҕыллар. Игирэ оҕо төрөөтөҕүнэ, бастакы оҕо ылар.
Ангелина Васильева, “Саха сирэ” хаһыат, edersaas.ru