Сайын саҕаланыаҕыттан сөҥүү төрүт түспэккэ, Нам улууһа уонна илин эҥээр улуустар курааннаатылар, эбиитин аһыҥа турда.
edersaas.ru
«Россельхозкиин» федеральнай судаарыстыбаннай бүддьүөт тэрилтэтин Саха сиринээҕи салаата бу алта улууска 11 тыһыынча гектар ходуһаны чинчийэн, 10 тыһыынча гектарга аһыҥа турбутун быһаарбыт, онтон 4 тыһыынча гектарга аһыҥаны дьааттыыр эмп ыстарылынна.
Санатан эттэххэ, ирдэбит быһыытынан, аһыҥаны өлөрөр эмп төгүрүччү бүтэйинэн күрүөлэммит, сүөһү уонна сылгы киирбэт сирдэригэр ыстарыллыахтаах. Итинтэн олуллан, үгүс хаһаайыстыба ходуһатыгар эмп ыстарбата. Ол эрээри, «Россельхозкиин» федеральнай судаарыстыбаннай бүддьүөт тэрилтэтин Саха сиринээҕи салаатын салайааччы Агнесса Данилова этэринэн, бүтэйдэммэтэх да ходуһаларга эми ыстаран баран, үс хонукка сүөһүнү-сылгыны киллэрбэт гына дьуһуурустуба олохтуохха сөп эбит. Кураан дьыллар эҥээрдэригэр үктэммиппитинэн, маннык ньыманан төһө кыалларынан элбэх ходуһаны хабан эмтиир наада.
Раиса Сибирякова, «Саха сирэ» хаһыат, edersaas.ru