3D ньыманан коронавирустан сирэй хаххатын Горнай оскуолата оҥордо

Бэрдьигэстээххэ А.Осипов аатынан орто оскуола кэлэктиибэ, коронавирустан харыстанарга, улуустааҕы балыыһаларын үлэһиттэригэр анаан, 3D ньыманан сирэй хаххата оҥордо. Бүгүн сүүрбэччэни улуус киин балыыһатыгар туттардылар.

Бу туһунан биһиэхэ оскуола дириэктэрэ Анджелика Альбертовна Гаврильева  кэпсиир:

—Биһиэхэ улуустааҕы үөрэх управлениетын начаалынньыга Варвара Ильинична Сметанина коронавирус дьаҥыттан харыстанарга сирэй хаххатын (защитный щит) оҥоруоххутун сөп диэн этии киллэрбитэ, хайдах оҥорорго ньыматын булан биэрбитэ. Оттон Дьокуускайтан эдэр киһи Георгий Иванович Алексеев принтербитин анал заправканан хааччыйбыта. Учууталлар харчынан кыттыспыппыт уонна онон харыстанар хахха (щит) иннигэр тутуллар пластигы ылбыппыт.

Көрдөххө судургу курдугун иһин, сүрдээх бырыынчыктык оҥоһуллар эбит. Онуоха принтербит кыра буолан, оҥорорго балачча бириэмэ барар. Күҥҥэ биэс устууканы ситэрэн-хоторон  бүтэрдэххэ үөрүү бөҕө буолабыт. Бу хаххалары быраастар мааскаларын таһынан кэтэллэр. Элбэхтэ туһаныллар.

Бүгүн улуус киин балыыһатыгар туттардыбыт. Балыыһалар «Дьаҥтан харыстанарга маннык ураты оҥоһуулаахсирэй  хаххатын аан бастаан туттубут. Буолан баран, бэйэбит дьоммут кыһаллан-мүһэллэн оҥорбуттарын» диэн наһаа үөрдүлэр, — диэн кэпсээтэ.

Оскуола  кэлэктиибэ «Мейкердэр COVID-19″ утары» диэн үтүө санаа аахсыйатыгар кыттаннар,  Н.Н.Александров  салайар  «Точка роста» оскуола иһинэн былырыын күһүҥҥүттэн үлэлиир профильнай кииҥҥэ  3 D  принтергэ,  «Сталкер» диэн  дьаҥтан-дьаһахтан харыстанарга кэтиллэр мааскалары Future Skills: NEFU  ньыматынан оҥорбуттар. Бу мааскалары оҥорорго барыта 347 миэтэрэ пластик туттуллубут.

Оскуола салалтата  улуус үөрэххэ управлениетын начаалынньыгар Варвара Ильинична Сметанинаҕа,  Дьокуускайга олорор үтүө санаалаах Георгий Иванович Алексеевка улахан көмөлөрүн, өйөбүллэрин иһин сүһүөхтээх бэйэлэрэ сүгүрүйэн, хоолдьуктаах бэйэлэрэ хоҥкуйан туран барҕа махтал тылларын тиэрдэллэр. Чэгиэн доруобуйаны, ситиһиини баҕараллар.

Үчүгэй сонунтан киһи үөрэр. Харыстанар хахханы ыраах үлэһэн, ол хаһан кэлэрин кэтэһэн күнү-дьылы бараабакка, олохтоох бэйэбит дьоммут бэртээхэй мааскалары оҥорбуттара, ама, кими сөхтөрбөт буолуоҕай?! Оттон үтүө санаалаах дьон көмөлөспүттэрэ үөрүүнү өссө үрдэтэр.

Сардаана Баснаева, «Саха сирэ» хаһыат, edersaas.ru

Хаартыскалар:  А.Осипов аатынан оскуолаттан