Самаан сайын сатыылаан, куйаастар түһэн эрэр кэмнэрэ.
edersaas.ru
Ол да иһин буолуо, аны сылыйарын кытта, «хаһан бу куйаас бүтэрий?» диэн бэйэ-бэйэлэриттэн сураһан, батсаапка күн-дьыл билгэтин халандаарын ыытыһан эрэллэр.
Холобур, бу халандаарга +37 кыраадыс «уруһуйдаммытын» көрөн баран, миэхэ «Тускултан ыйыт эрэ, ити кырдьык +37 кыраадыс куйаас буолар дуо?» диэн ыйытан суруйдулар.
Тускулга «Кырдьык дуо?» диэн Чурапчы Хайахсытыгар эрийэн тиийдим. Киһим күн солото суох сылдьар эбит.
— Бэс ыйын 21 күнүгэр буолуохтаах «онлайн»-ыһыахха бэлэмнэнэ сылдьабыт. Ити +37 кыраадыс диэн олох да сымыйа! Бэс ыйыгар хаһан да итинник буолбат. 2011 сыллаахха от ыйыгар + 37 «рекорднай» куйаас Аммаҕа бэлиэтэммитэ. Онон ити халандаарга мин итэҕэйбэппин.
Хата бу халандаар билгэтигэр итэҕэйиҥ. Бу оруобуна көрдөрө турар.
Бу күннэргэ Халыма—Индигиир улуустарыгар уонна икки тымныытынан аатырар улуустарга — Өймөкөөҥҥө уонна Дьааҥыга +33 кыраадыс куйаас турар. Бу эҥэр маннык куйаас өтөр бэлиэтэнэ илигэ. Урут этэн аһан аһарбытым курдук, Европа уонна Азия континеннарыгар тымныйан эрэр буолан, Хоту сиргэ сылыйар. Итинник куйаас күн-дьыл 20-30 сыл барыаҕа. Ол саҥа саҕаланан эрэр буолан, ити ааттаабыт хоту улуустарбар куйаас күн-дьыл бүгүҥҥү күҥҥэ бэлиэтэнэр. Онон хоту улуустарга хайа хаара ууллан, сүүрүктээх уу суолу-ииһи эһэн моһуоктуоҕа.
Куйаас ордук Дьокуускайга бэлиэтэниэҕэ. Атын киин улуустарга наһаа куйаарыа суоҕа. Бу маннык итии күн-дьыл икки нэдиэлэттэн ордук туран баран, от ыйын ортотун диэки сөрүүкүөҕэ. Онон сөтүөҕэ сөптөөх кэм икки нэдиэлэ эрэ курдук олохтонно.
Ол эрээри бэлиэтээн эппитим курдук, быйыл олох ураты сайын. Куйаара туран эмискэ этиҥнээх ардах курулаччы түһүөҕэ, тобурахтаан да ылыаҕа, күүстээх тыал да түһүөҕэ. Кураанах этиҥ үгүс буолуоҕа. Ойуур баһаара турар куттала баар. Онон «куйаарда» диэн наһаа налыйан хаалымаҥ. Оҕуруоккутун көрө-истэ сылдьыҥ.
Норуот синоптигын санаата дьэ, итинник.
Елена ПОТОЦКАЯ, «Саха сирэ» хаһыат, edersaas.ru