Ааспыт сууккаҕа Саха сиригэр 37 киһи коронавируска сутулунна
От ыйын 6 күнүгэр өрөспүүбүлүкэ Ил Дархана Айсен Николаев быһа эпииргэ уопсай балаһыанньаны иһитиннэрдэ.
Ол курдук, ааспыт сууккаҕа өрөспүүбүлүкэ үрдүнэн уопсайа 37 киһи коронавирус дьаҥар сутуллубут. Онтон 29 киһи Дьокуускай куоракка ыалдьыбыт, 3 киһи — Дьааҥыга, 2 киһи — Мэҥэ Хаҥаласка уонна хас да атын улуустарга сутуллубуттар. Улуустарга ыарыы тарҕаныыта күүстээх хонтуруолга ылыллыбытын эттэ.
Билиҥҥи туругунан 36 киһи ыарахан туруктаах, 11 киһи ИВЛ-аппараакка холбонон сытар. Ыарахан туруктаах дьон үксэ аҕам саастаахтар диэн Ил Дархан эттэ.
37 киһи ыалдьыбыта ыам ыйын 15 күнүттэн бэлиэтэнэн илик диэн Ил Дархан иһитиннэрдэ. Салгыы ыалдьыбыт дьон ахсаана аҕыйаатар, хааччахтаныыны сымнатыы үһүс түһүмэҕин саҕалыахха сөп диэтэ. Доруобуйа харыстабылын эйгэтин үлэтэ-хамнаһа былааннаммыт эрэсиимҥэ от ыйын 15 күнүттэн эрдэ киириэ суоҕа. Онон бары харыстанар ирдэбили тутуһары, дьон тоҕуоруһар сиригэр сылдьыыны аҕыйатары, мааска кэтэр булгуччутун туһунан Ил Дархан ыйда.
Ульяна Захарова, edersaas.ru