35-с оскуола тутуута доруобуйатынан хааччахтаах оҕо үөрэнэригэр усулуобуйатын тупсарда
35-с №-дээх оскуола дьиэтэ Дьокуускай куорат 23-с кыбартаалыгар былырыын тутуллубута. Үс мэндиэмэннээх 7 тыһ. кыбадыраат иэннээх аныгы тутуу 275 оҕо үөрэнэригэр суоттаммыт. Киэҥ-куоҥ кэбиниэттэри таһынан, спортивнай уонна аактабай саалалардаах, остолобуойдаах, уутун ыраастыыр бассейннаах.
edersaas.ru
Саҥа тутуу доруобуйаларынан хааччахтаах оҕолор үөрэнэр усулуобуйаларын тупсарыыга көмөлөстө. Манна 1-кы №-дээх өрөспүүбүлүкэтээҕи балыыһаҕа – Медицинэ национальнай киинигэр уонна Фтизиатрияҕа уһун кэмҥэ эмтэнэр оҕолор, ону тэҥэ уҥуохтарыгар-сүһүөхтэригэр (опорно-двигательные) кэһиллиилээх, хараҕынан инбэлиит уонна мөлтөхтүк истэр оҕолор үөрэнэллэр. Ол иһин, саҥа тутуу киирэргэ-тахсарга судургу буоларын курдук пандустардаах, икки анал лифтээх, киэҥ-куоҥ көрүдүөрдэрэ мөлтөхтүк хаамар-сиимэр оҕолор сылдьалларыгар табыгастаахтытык суоттаммыттар.
Уһук Илини сайыннарыы министиэристибэтин салайааччыта Александр Козлов Дьокуускайга бэс ыйыгар кэлэ сылдьан, инклюзивнай үөрэх оскуолатын тутуута инники күөҥҥэ турар соруктартан биирдэстэрэ буоларын бэлиэтээбитэ уонна дойду хааһынатыттан өрөспүүбүлүкэҕэ үп-харчы суһаллык кэлиитигэр көмөлөһүөх буолбута. Ол түмүгэр, өрөспүүбүлүкэ саҥа тутуу ситэригэр дойду хааһынатыттан 360 мөл. солк. ылбыта.
Үбүлээһин Экэниэмикэ киинин социальнай сайдыытын былаанын олоххо киллэрии иитинэн кэлбитэ.
Инклюзивнай үөрэхтээһин оскуолатын үлэҕэ киллэрии оҕолорго уонна төрөппүттэргэ кэтэһиилээх бэлэҕинэн буолар.
Оскуола соруга – инклюзивнай-абилитационнай педагогика үөрэнээччилэр уонна педагогтар ситиһиилэрин сабыдыала. Оскуола “Мөлтөх доруобуйалаах уонна кыраларыттан инбэлиит оҕолору социальнай-педагогическай өттүнэн чөлүгэр түһэрэр, адаптациялыыр оскуола-киин”, “Ураты ирдэбиллээх оҕолорго абилитационнай педагогика”, “Дьокуускай куорат уокуругун дьаһалтатын үөрэҕин управлениетын оскуолатын ситимэ”, “Дистанционнай үөрэхтээһини өйүүр үөрэх киинин тэрийии” диэн түөрт эспэримиэнниир бырагырааманан үлэни ыытар.
СӨ Ил Дарханын уонна Бырабыыталыстыбатын пресс-сулууспата