Бүгүн СӨ үөрэҕин уонна наукатын миниистирин солбуйааччы Владимир Тихонов салайааччылаах бөлөх Дьокуускай куорат 35-с нүөмэрдээх оскуолатын тутуутун тиийэн көрдө. Тустаах оскуола норуокка “бытыктаах” тутуунан биллэр. Дьэ, силигин ситэн, үлэҕэ киирэрэ кылгас кэм хаалла.
Маҥнай оскуола тутуутун хаамыытын сир боппуруоһа атахтаабыта, онтон үп-харчы кырыымчыга мэһэйдээбитэ. Быйыл федеральнай хааһынаттан үп көрүллэн, силигин ситэн эрэр.
Тутууга үгүс уопуттаах «Кинг-95» ХЭУо тустаах эбийиэккэ маастара Ашот Майтисян: “Бүгүҥҥү күҥҥэ эбийиэк 85 бырыһыана бэлэм. Билиҥҥитэ ситэрэр, киэргэтэр үлэлэр бараллар. Ону тэҥэ бассейны, аактабай сааланы үмүрүтэбит. Дизайнердары, тастан кэлэн үлэлээччилэри аахсыбакка туран, барыта 100-чэкэ киһи үлэлиир”, — диэн кэпсиир.
Суруналыыстар тутууну кэрийэн көрдүбүт. Оскуола 3 мэндиэмэннээх, 275 миэстэлээх, уопсай иэнэ – 7037 кыбадыраатынай миэтэрэ, суумата – 350-ча мөл. солк. Уопсай үөрэхтээһин бырагыраамалаах, доруобуйаларыгар хааччахтаах оҕолор үөрэнэр оскуолалара буолуоҕа.
Владимир Тихонов: “Ахсынньы 25 күнүгэр диэри тутааччылар эбийиэги барытын, туох баар тэрилин холбоон туттарыахтара. Куоракка өссө биир аныгылыы, сырдык эбийиэк баар буолуоҕа”, — диэн этэр.
Атын оскуолалартан уратыта диэн, бассейннаах. Бассейҥҥа киирбиппит үлэ күөстүү оргуйар, биэс киһи дьон киирдэ диэн тохтуу түспэккэ, илиилэрин араарбакка үлэлииллэр.
Манна даҕатан эттэххэ, СӨ үөрэҕи сайыннарыыны хааччыйар ресурснай киин дириэктэрин солбуйааччы Евгений Афанасьев иһитиннэрбитинэн, бу сылга өрөспүүбүлүкэ үрдүнэн араас бырагырааманан, уопсайа, 13 оскуола үлэҕэ киириэхтээх.
Людмила ПОПОВА, “Саха сирэ” хаһыат, edersaas.ru
Ольга СТАРОСТИНА (СИА) хаартыскаҕа түһэриитэ.