Өрөспүүбүлүкэ үрдүнэн быйыл, бас билии көрүҥүттэн тутулуга суох, 479 тыһ. 361 туонна от бэлэмнэниэхтээх.
edersaas.ru
Эдьигээн уонна Жатай былааннарын аһары толордулар
Тыа хаһаайыстыбатын уонна ас-үөл бэлиитикэтин министиэристибэтин Сири оҥорууга, мелиорацияҕа уонна материальнай-тиэхиньиичэскэй хааччыйыыга департамена иһитиннэрэринэн, атырдьах ыйын 19 күнүнээҕи туругунан, 341 тыһыынча 840 гектар ходуһа сирэ охсулунна, 348 тыһыынча 332 туонна от чөкөтүлүннэ. Ити — былаан 72,7 бырыһыана. Кураантан өрүсүһэн, илин эҥээр уонна киин улуустар хотуурдарын эрдэ тыаһаппыттара. Онон билигин Мэҥэ Хаҥалас хаһаайыстыбалара 30 890, чурапчылар 29 278, таатталар 26 408, хаҥаластар 24 526, намнар 22 425, уус алданнар 22 245, аммалар 22 038 туонна оту кэбистилэр. Бүлүү эҥээрдэри ыллахха, сунтаардар 27 093, ньурбалар 26 171, бүлүүлэр 21 389, үөһээ бүлүүлэр 19 643, кэбээйилэр 13 798 туоннаны чөкөттүлэр. Хотугу улуустартан орто халымалар 6 169, дьааҥылар 4 462, уус маайалар 2 055, абыйдар 1 466, өймөкөөннөр 1 381, муомалар 771 туонна оту оттоотулар. Былаанын икки муниципальнай тэриллии куоһарбыт: Эдьигээн улууһа 140 туоннаны, Жатай бөһүөлэгэ 74 туоннаны оттооннор, сорудахтарын туһааннааҕынан 107 уонна 151 бырыһыан толорбуттар. Маны таһынан 1 168 т сиилэс угулунна, 745,5 т сенаж оҥоһулунна. Ол иһигэр, Хаҥалас улууһа 500, Ньурба 300, Мирнэй 210, Мэҥэ Хаҥалас 150, Ленскэй 8 т сиилэстээтилэр, Томпо улууһа 210, Амма 150, Алдан 82, Үөһээ Бүлүү 3,5 т сенаһы бэлэмнээтилэр.
Саппааска биир туонна оттонно!
—Биһиэхэ быйыл үүнүү куһаҕана суох, — диэн кэпсиир Бүлүү улууһун тыатын хаһаайыстыбатын управлениетын кылаабынай агронома Мария Николаева. – Сыл тахсар оппут 80 бырыһыанын хааччынан олоробут. Ити иһигэр Балаҕаччы, Тоҕус уонна Иккис Күүлэт нэһилиэктэрэ былааннарын толордулар. Ити иһигэр производственнай кэпэрэтииптэр үс тыһыынча, бааһынай хаһаайыстыбалар түөрт тыһыынча, кэтэх хаһаайыстыбалар 14 туонна сүөһү дороххой аһылыгын бэлэмнээтилэр. Кэтэх ыаллар үксүлэрэ кыстыыр отторун хааччынан, хотуурдарын ыйаатылар.
Элбэх сүөһүлээх бөдөҥ хаһаайыстыбалар көрдөрүүлэрэ үчүгэй. Ол курдук, Кыргыдайга Анастасия Кырбасова салайар “Илин” бааһынай хаһаайыстыбата тэтимнээхтик оттуу сылдьар, 400 туоннаны оттуур былаанын толорорго эрэллээх. Дьөккөҥҥө Иван Ионов салайар “Сиккиэр” бааһынай хаһаайыстыбата чугастааҕы ходуһаларыгар сүүстэн тахса туонна оту оттоон, кыбыытыгар таһан баран, Сыгында диэн ыраах учаастагар оттуу барда. “Мастаах” кэпэрэтиип 700 туоннаны оттоон, инники күөҥҥэ иһэр, сүөһүтүн кыстатар отун хааччыммытын таһынан, саппааска оттоон эрэр. Лөкөчөөҥҥө “Тускул” бааһынай хаһаайыстыбатын баһылыга Афанасий Харлампьев сирэ кырыымчык буолан, ходуһаларын оҥостон, элбэх сыллаах оту үүннэрэр, ону таһынан сыллата сир түүлэһэн, Туймаада хочотугар тиийэн оттуур. Быйыл кини дойдутугар уонна киин куорат таһынааҕы Бүгүр диэн арыыга холбоон 450 туоннаны оттоото. Онон бэйэтигэр сөп буолары хааччынан, билигин атыыга анаан оттуур. Атын да нэһилиэктэр биригээдэ тэринэннэр, ыраах учаастактарынан саппааска оттуу сылдьаллар. Инньэ гынан, Бүлүү улууһа өрөспүүбүлүкэ саппаас пуондатыгар 1,5 тыһыынча туонна оту бэлэмниир сорудахтааҕыттан биир туонната баар.
Раиса Сибирякова, «Саха сирэ» хаһыат, edersaas.ru