Өрөспүүбүлүкэтээҕи 2 №-дээх балыыһа оториноларингологияҕа отделениетын иллээх-эйэлээх кэлэктиибигэр үөрүүлээх күн.Балыыһа сүрүннүүр оториноларинголог-хирура, үрдүк квалификациялаах быраас Гаврил Неустроев “Арассыыйа Федерациятын үтүөлээх бырааһа” үрдүк ааты ылла.
Дьокуускай куорат оториноларингологтарын ассоциациятын чилиэнэ, талааннаах быраас, уонунан бэчээтинэй үлэ ааптара Гаврил Неустроевы биир идэлээхтэрэ улахан учууталынан ааттыыллар.
Лор-уорганнар уларыйыыларынан сибээстээн тахсыбыт араас эчэйиилээх, искэннээх ыарыһахтары эмтээһин аныгы ньымаларын толору баһылаабыт хирург Гаврил Гаврильевич пластическай функциональнай уонна эстетическэй хирургия ньымаларынан биир бастакынан баһылаабыта, – диэн биир идэлээхтэрэ киниттэн элбэххэ үөрэнэллэрин туһунан этэллэр.
Гаврил Неустроев 1984 с. Саха судаарыстыбаннай университетын медико-лечебнай факультетын бүтэриэҕиттэн Өрөспүүбүлүкэтээҕи 2 №-дээх балыыһа—Суһал медицинскэй көмө киинин лор отделениетыгар 34 сыл тухары ханна да халбаҥнаабакка үлэлии сылдьар.
Үтүөлээх быраас көҕүлээһининэн эмсэҕэлээбит уорганнары оннунан хаалларар үгүс ахсааннаах лор-эпэрээссийэлэри оҥорон кэллэ. Бу отделениеҕа эмтэммит төһөлөөх элбэх ыарыһах киниэхэ махтал тылларын эппитэ буолуой? Кинилэртэн биирдэстэрин хоһооно биир идэлээхтэрэ Гаврил Неустроевка анаан таһаарбыт хаһыаттарын киэргэтэр.
Зоя ИГНАТЬЕВА, Надежда ЕГОРОВА, “Саха сирэ” хаһыат, edersaas.ru