Бэҕэһээ М.К.Аммосов аатынан Хотугулуу-Илиҥҥи федеральнай университеты бүтэрбит 334 киһиэхэ кыһыл дипломнары туттардылар.
ХИФУ ректорын эбээһинэһин толорооччу Евгения Михайлова тыл этэригэр ыччаттар билиҥҥи сатабылларын, дьоҕурдарын ыһыктыбаттарыгар эрэнэрин биллэрдэ. “Биһиги быстах кэмҥэ арахсабыт. Саҥа бэлитиичэскэй быһаарыынан, университет эһигини салгыы сирдиэҕэ, үлэнэн хааччыллыыгыт, хамнаскыт, эйгэҕит туһунан отчуоттуоҕа”, — диэн иһитиннэрдэ итиэннэ баҕа санааларын тиэртэ.
“Эксперт РА” эриэйтининэн ХИФУ Арассыыйаҕа научнай хайысхаҕа 20 бастыҥ университет кэккэтигэр киирдэ. Эриэйтиҥҥэ 1500 үрдүк үөрэх тэрилтэлэриттэн 26 эрэ талыллыбыт.
ХИФУ Хотугулуу-Илиҥҥи норуоттарын тылларын уонна култуураларын үнүстүүтүн (магистратура) кыһыл дипломунан бүтэрбит, Уулаах Аан (Хаҥалас) уһуйаанын сэбиэдиссэйэ Лариса Атласова кинилэртэн биирдэстэрэ:
— Саха тылын истилиистикэтин уонна нууччалыы-сахалыы тылбаас хаапыдыратыгар билигин үлэлии сылдьар үлэбэр туһалаах буолуо диэн анаан туттарсан киирбитим. Маҕыыстыр үлэтин «Оскуола иннинээҕи үөрэхтээһин эйгэтин тиэрминнэрин тылдьыта уонна сүрүн докумуоннарын тылбааһа» диэн тиэмэҕэ суруйдум. Бу биһиги үлэлиир эйгэбитигэр анал тиэрмин тылдьыта суоҕуттан, сахалыы уһуйаан иитээччилэрэ күннээҕи үлэлэригэр кэниспиэк суруйарга, о.д.а үлэҕэ ыарахаттары көрсөллөрүттэн таҕыста. Өссө чочуйан, силигин ситэрэн, тылдьыт таһааттарар былааннаахпын, — диэн санаатын үллэстэр.
Санатан эттэххэ, быйыл университеты 3500-тэн тахса киһи бүтэрбититтэн, 334-дэ — кыһыл дипломунан. Үөрэнэр хаһан даҕаны хойут буолбатах.
Людмила ПОПОВА, “Саха сирэ” хаһыат, edersaas.ru