33 кыраадыс куйаас буолара күүтүллэр

Бөлөххө киир:

Бэс ыйын бүтэһик күннэригэр Саха сирин киин улуустарыгар олус итии, куйаас күннэр туруохтара. Дьокуускайдааҕы гидрометеокиин иһитиннэрбитинэн, бэс ыйын 26-27 күннэригэр 32-33 кыраадыс итии буолара күүтүллэр.

Бу хас да сыллаах кэтээн көрүүгэ олоҕурбут нуорматтан 7 кыраадыһынан үрдүк. Сөҥүү суох. Күнү-дьылы билгэлиир сорох саайтарга бу күннэргэ букатын да +35, +38 кыраадыһы көрдөрөллөр. Бу күн көрөр сиригэр, сыралҕаҥҥа бачча кыраадыс буолуон сөп, онон күнтэн харыстанар миэрэлэри тутуһа сылдьыҥ.

Ол курдук, сэлээппэни, хара ачыкыны, чараас эрээри, илиини-атаҕы хаххалыыр таҥаһы кэтиҥ, күнтэн харыстанар кириэми туһаныҥ. Ууну элбэхтик иһэ сылдьыҥ. Күнүс таһырдьа тахсар буоллаххытына, күлүктээх сиргэ сылдьа сатааҥ. Элбэхтик сөтүөлээҥ, сөрүүн уунан суунуҥ. Ыһыахтыы барарга бу сүбэлэри туһаныҥ уонна күнтэн хаххалыыр зонтиктаах, сапсыыкалаах буолар үчүгэй.

Ангелина Васильева, “Саха сирэ” хаһыат, edersaas.ru

Хаартыска: СИА.

+1
0
+1
0
+1
0
+1
0
+1
0
+1
0
+1
0