Бу дьыл ахсынньы 18 күнүгэр Дьокуускай куорат дьаһалтатын үөрэххэ управлениетын начаалынньыга Алексей Семенов Саҥа дьыллааҕы уонна Ороһуоспатааҕы бырааһынньыктарынан сибээстээн, бэлэҕи биэрии уонна ылыы туһунан сүбэлиир суруга таҕыста.
edersaas.ru
Сурукка Дьокуускай куорат уокуругун дьаһалтатын үөрэххэ управлениета РФ хоруупсуйаны утары сокуонун балаһыанньатын уонна Гражданскай кодексын тутуһар туһунан ыйыллар. Судургутук быһаардахха, судаарыстыбаннай уонна муниципальнай дуоһунастаахтарга, сулууспалаахтарга, биирдиилээн тэрилтэ үлэһиттэригэр сыаналаах бэлэҕи оҥорор уонна ылар бобуллар. Арай, боротокуолунан ыытыллар тэрээһиннэргэ, командировкаҕа уонна да атын официальнай тэрээһиннэргэ сылдьан ылар бэлэхтэриҥ эрэ хабыллыбаттар. Дуоһунастаах дьон итинтэн атын түгэннэргэ бэлэх-туһах ылаллара көҥүллэммэт.
Сурукка суумата ыйыллыбатах. Ол оннугар Гражданскай кодекска ырылхайдык ыйыллар. Ол курдук, Гражданскай кодекс 575-с ыстатыйатыгар олоҕуран, култуура, үөрэх, доруобуйа харыстабылын үлэһиттэригэр 3000 солк. сууматтан үрдүк суумалаах бэлэҕи оҥорор бобуллар. Оттон сыаналаах бэлэҕи тутуон баҕарар тойон үлэтин миэстэтиттэн, үлэлиир кэмиттэн ураты атын сиргэ, бириэмэҕэ (эрэстэрээҥҥэ, дьиэтигэр…) ыҥыран төһө баҕарар аһатыан, бэлэх ылыан сөп.
Биллэн турар, кэпсэтии төһө даҕаны 3001 солк. суума туһунан буоллар, барыта кыраттан саҕаланарын умнар табыллыбат. Бэлэх даҕаны араастааҕын умнумаҥ.
Людмила ПОПОВА, “Саха сирэ” хаһыат, edersaas.ru