«Билигин манна олорооччулар, бүгүн бу Общественнай кииҥҥэ киирбит дьон хас саастаахтарын, ханнык маҕаһыынтан тугу атыылаһалларын, хас оҕолоохторун, хайдах дьиэлээхтэрин, ханна сөбүлээн сынньаналларын барытын билэр-көрөр кыахтаахпыт», — диэн СӨ Инновациятын, цифровой сайдыытын уонна инфокоммуникационнай технологиятын миниистирэ Анатолий Семенов мустубут дьону соһутта.
edersaas.ru
Дьокуускайга муус устар 11-12 күннэригэр пресс-сулууспа уонна сонуннары киэҥник тарҕатар ситим үлэһиттэригэр, блогердарга анаммыт «Медиаоскуола: Уһук Илиннээҕи репортер» диэн IV түмүктүүр сессия буолан ааста. Уопсайа 50 кыттааччы идэ таһымын үрдэппиттэрин туһунан ТАСС сэртипикээтин ылыахтара.
Икки күн тухары SMM технологиятын көмөтүнэн Уһук Илин хайдах хайп оҥорон, сурутааччыҥ ахсаанын элбэтиэххэ сөбүн, социальнай ситимнэргэ информационнай сэрии таҕыстаҕына ону уҕарытыы, дьыалабыай репутацияны алдьатыы, көмүскэнии, чөлүгэр түһэрии о.д.а. туһунан кэпсэтии таҕыста. Блогердар оскуолаларын төрүттээччи Андрей Глазунов, «Коммерсантъ» шеф-эрэдээктэрэ Глеб Черкасов, Mail.Ru Group коммуникацияҕа вице-бэрэсидьиэнэ Александр Кармаев уо.д.а. сүбэ-ама биэрдилэр.
Холобур, хайп оҥорорго хайаан да таҥаскын устан, кыыс оҕо кэрэ быһыытын-таһаатын бар дьоҥҥо көрдөрүөхтээх диэн буолбатах. Сахабыт сирин муҥутуур тымныытын, кырыарбыт уһун кыламаҥҥын, айылҕабыт уратытын, дьон талаанын көрдөрөн, лайк эмиэ хомуйуохха сөбүн эттилэр.
Миниистир Анатолий Семенов Сахабыт сирэ сотору кэминэн IT технология сайдыытынан, киллэрэр үбүнэн-харчытынан бырамыысыланнай хампаанньалары сорох-сорохторун куоһарыан сөбүн туһунан иһитиннэрдэ. «FNTASTIC» араас платформаҕа оонньуу оҥорор хампаанньа бастакы ыйыгар биир мөлүйүөн дуоллары киллэрбитэ. Смартфоннарга, айфоннарга көмпүүтэр оонньуутун оҥорон аан дойду үрдүнэн аатырбыт, Эмиэрикэҕэ саамай элбэхтик хачайдыыр ТОР-рейтиннэрин баһылаабыт «MyTona» корпорация өрөспүүбүлүкэ бүддьүөтүгэр 300 мөлүйүөн солкуобай нолуогу киллэрэр.
Оттон IT-оскуолаҕа үөрэнэр 11 кылаас оҕолоро дьон сүтэрбит малын булар сыһыарыы оҥорбуттар. Аны оҕо оскуолаҕа тугу аһыырын төрөппүт смартфон көмөтүнэн хонтуруоллуур сыһыарыытын Дьокуускайдааҕы IT-паарка резиденнэрэ айан таһаарбыттар.
«Биһиги инники сорукпут 3000-5000 дуоллар хамнастаах 10 000 үлэ миэстэтин бу эйгэҕэ тэрийиэхтээхпит. Оччотугар дьон олоҕун чэпчэтэр мобильнай сыһыарыылары, «өйдөөх тэриллэри», оонньуулары оҥорон, аан дойдуга таһаардахпытына, мөлүйүөнүнэн дуоллар, бастатан туран, Сахабыт сиригэр киириэҕэ. Ол үптэн нолуок, хамнас барыта манна төлөнөр буолан, харчыны дьон Дьокуускайга туттуоҕа, кафелар, эрэстэрээннэр, маҕаһыыннар барыстара эмиэ тилэх баттаһа улаатыа. Олох таһыма таһыччы үрдүө. IT-паарка иһинэн кэлэр үс-биэс сыл иһигэр миллиард дуоллар капитализациялаах хампаанньаны үүннэрэн-сайыннаран таһаарарга былаан оҥостон үлэлиибит. Маны олоххо киллэрэргэ үгүс-үтүмэн тэрээһин ыытыахпыт. Онтон биирдэстэрэ быйыл Стартап-экспедиция Уһук Илин 11 эрэгийиэннэрин кэрийэ сылдьан, айтишниктар күүстэрин түмэн, ким туох саҥа арыйыылааҕын, өссө тугу оҥоруохха сөбүн билсиэхпит», — диэн миниистир Анатолий Семенов пресс-конференциятыгар кэпсээтэ.
Ол аата программистар, веб-дизайнердар, менеджердэр ортотунан 195 – 325 тыһыынча хамнастаах буолуохтара. Ити курдук креативнай экэниэмикэҕэ инникигэ улахан хардыы, киһи хапытаалын сайыннарыы бу кэлэр үс-биэс сыл иһигэр олоххо киириэн сөп. Онон төрөппүттэр оҕолорун билиҥҥиттэн чааһынай IT-оскуолаҕа биэрэ сатыыллар, инникилэрин хааччынаары улахан күөн күрэстэһиини ааһаллар.
Күн бүгүн куоракка 50-ча чааһынай IT-оскуолалар үлэлииллэр, IT –кииннэр улуустарга эмиэ аһыллан, киэҥник тарҕанан иһиэхтэрэ.
Марианна Тыртыкова, «Саха сирэ», edersaas.ru