Устудьуоннар күннэрин көрсө, СӨ Үөрэҕин уонна наукатын миниистирэ Владимир Егоров орто анал үөрэх тэрилтэтин бастыҥ устудьуоннарыгар СӨ Ил Дарханын истипиэндьийэтин туттартаата.
edersaas.ru
Санатан эттэххэ, Ил Дархан истипиэндьийэтэ 2011 сылтан бэриллэр. Быйыл истипиэндьийэни уопсайа 11 үөрэх кыһатыттан 30 устудьуон ылар чиэскэ тигистэ. Кинилэргэ сыл устата ый аайы үстүү тыһыынча солкуобай көрүллэр.
СӨ Үөрэҕин уонна наукатын миниистирэ Владимир Егоров устудьуоннары эҕэрдэлээн туран, бу күн ханнык эрэ хайысхаҕа ситиһиилээхтэр эрэ буолбакка, устудьуон аймах бары бэлиэтиир бырааһынньыга диэн эттэ. “Эһиги иннигитэр олох киэҥ аартыга саҥа арыллан эрэр. Биһиги устудьуоннарбыт өрөспүүбүлүкэлэрин туһугар айар-тутар дьон буолалларыгар эрэнэбин. Саха сирин үөрэҕин тэрилтэлэрэ Арассыыйаҕа лидердэр кэккэлэригэр киирэллэр. Ааспыт сыллаахха WorldSkills национальнай чөмпүйэнээккэ дьоһуннаахтык кыттан, Арассыыйа субъектарын кэккэтигэр 16-с миэстэлэммиттэрэ. Быйыл өссө үрдүк кирбиини ылыахтаахпыт”, — диэн миниистир бэлиэтээтэ.
Араас үөрэх кыһатын талааннаах устудьуоннара доҕотторун ырыанан, үҥкүүнэн, муусуканан нүөмэрдэринэн эҕэрдэлээтилэр.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриилэрэ.