Дьокуускай куорат 3-с №-дээх поликлиникатыгар кэлиҥҥи күннэргэ эмчиттэр дьону көрүүлэрэ-истиилэрэ сыыйа бэрээдэктэннэ.
edersaas.ru
Бу туһунан ыарыһахтар үөрэ-көтө бэлиэтииллэр. Бастатан туран, ыалдьар киһи поликлиника үлэтин-хамнаһын бэйэтинэн көрөн-истэн билэн астынар эбэтэр санаата холлор буоллаҕа. Үлэ усулуобуйата тупсубутун Дьааҥыттан сылдьар педагогическай үлэ бэтэрээнэ Ульяна Шишигина бу курдук санаатын үллэстэр:
— Этээс аайы регистратураны солбуйар аппарааттары туруорбуттар. Онно иккилии буолан устудьуоннар тураллар, ыйан-кэрдэн биэрэллэр.
Ыйыталаһан билбитим, барыта 60-тан тахса устудьуон быраактыкатын барар эбит. Соторутааҥҥа диэри бу аппараатттарыгар киһи бөҕө мустара, онно туспа уочарат этэ. Сүрдээх хартыына этэ. Биир чааһы быһа биир даҕаны киһи кыайан суруйтарбатаҕа. «Место занято» диэн тахса турар этэ. Биир да үрүҥ халааттаах үлэһит ол аппараат аттыгар суоҕа уустуктары үөскэппитэ. Билигин олох атын хартыына. Регистратура да үлэһиттэрэ арыыйда холкутуйбуттар. Икки эрэ киһи аа-дьуо ыксаабакка үлэлиир, көннөрү ыйан-кэрдэн биэрэллэр. Онон 3-с поликлиникаҕа сылдьар дьон махталлара муҥура суох. Быйыл күһүн киһи наһаа элбэх буолар этэ. Ол оннук түрүлүөн билигин суох, барыта — орун оннугар.
Кырдьык, бастакы кэм курдук буолбатах — ыгылыйыы, куттал арыый да намыраата. Сыстыганнаах дьаҥы бохсорго эмчиттиин-ыарыһахтыын үөрүйэх буоллулар диэххэ сөп. Оттон, бастатан туран, поликлиникалар маннык сөптөөх усулуобуйаны тэрийиилэрэ — бүгүҥҥү кэм тирээн турар боппуруоһа.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Ульяна Шишигина түһэриитэ.