Өрөспүүбүлүкэтээҕи 3 №-дээх килиниичэскэй балыыһа исписэлиистэрэ Саха сиригэр Ийэ сылын чэрчитинэн, бэс ыйын 21-25 күннэригэр Ньурба куоракка үлэлээтилэр. Кинилэр “Арассыыйа ийэлэрэ” уопсастыбаннай тэрилтэ сакааһынан дьахталларга дьахтар киэлитин шейкатын араагын эрдэ буларга аналлаах скрининг оҥордулар.
edersaas.ru
Мобильнай биригээдэни салайааччы, балыыһа предиктивнэй мэдиссиинэҕэ уонна биоинформатикаҕа киинин сэбиэдиссэйэ, мэдиссиинискэй наука хандьытаата Александра Степановна Асекритова иһитиннэрбитинэн, бу скрининг организм араак иннинээҕи туругун эрдэ быһаарарга эбэтэр килиэккэлэр “кутталлаах” килиэккэҕэ кубулуйуулара саҕаланыытын буларга көмөлөһөр.
Ону таһынан Александра Степановна предиктивнэй мэдиссиинэ уонна биоинформатика киинин кардиолога Анна Владимировна Павловалыын гиперхолестеринемия диэн утумунан бэриллэр ыарыыны быһаарар мэдиссиинискэй чинчийиини оҥордулар. Биллэрин курдук, гиперхолестеринемия сүрэх-тымыр ыарыылара сайдарыгар эбии кутталы үөскэтэр.
Оробуочай сырыыны, нэһилиэнньэни көрүүнү уонна сүбэ-ама биэриини сэргэ, балыыһа исписэлиистэрэ “Арассыыйа ийэлэрэ” уопсастыбаннай тэрилтэ Ньурбатааҕы отделениетын бэрэстэбиитэллэрин кытары көрүстүлэр.
Мобильнай биригээдэ ону таһынан Горнай уонна Орто Халыма улуустарыгар үлэлиэҕэ.
“Саха сирэ”, edersaas.ru саайтка анаан Яна БАЙГОЖАЕВА