Сүрүн

3 №-дээх балыыһаҕа федеральнай быраастар үлэлииллэр

Дьокуускай куорат 3 №-дээх  поликлиникатыгар ойуур баһаардарыгар сылдьыбыт волонтердарга диспансеризация саҕаланна.

Ойуур баһаарыгар сылдьан, испииһэккэ киирбит 615 баһаарынай-волонтер терапевт, эндокринолог, офтальмолог, отоларинголог, невролог быраастарга көрдөрүнүөхтэрэ. Бу үлэ уопсастыбаннай Добровольческай ыстаап салайааччыларыттан биирдэстэрэ Людмила Николаева көҕүлээһининэн ыытыллар. Доруобуйа туругун бэрэбиэркэтэ бу күннэргэ Саха сиригэр үлэлии кэлбит Сибиирдээҕи научнай-клиническэй киин Федеральнай медицинскэй-биологическай ааҕыныстыба эмчиттэрэ кыттыылаах ыытыллар.

Сибиирдээҕи научнай-клиническэй киин Федеральнай медицинскэй-биологическай ааҕыныстыба генеральнай дириэктэрэ Борис Баранкин уонна Дьокуускай куорат 3 №-дээх балыыһатын бырааһа Светлана Давыдова салгыы бииргэ үлэлээһин боппуруостарын ырыттылар.

ФМБА эмчиттэрэ балаҕан ыйын 14-24 күннэригэр ковиднай стационардарга  үлэлиэхтэрэ уонна баһаарынай волонтердардар доруобуйаларын бэрэбиэркэлиэхтэрэ.

 

Елена ПОТОЦКАЯ, “Саха сирэ” хаһыат, edersaas.ru

0
0