Дойду бэрэсидьиэнэ Владимир Путин 3-7 саастаах оҕолорго ыйдааҕы босуобуйа төлөнөрүн туһунан ыйаахха илии баттаата.
edersaas.ru
Босуобуйа 2020 сыл тохсунньу 1 күнүттэн төлөнүөхтээх, ол эбэтэр хос ааҕыы (перерасчет) оҥоһуллуохтаах. Сокуон олоххо киирэр мэхэньиисимэ оҥоһулуннаҕына, икки-үс ыйынан төлөөн барыахтара. Төлөбүрү биэрии хаамыытын төһө кыалларынан судургу гыннылар, ол дойду үрдүнэн биир буолуоҕа.
Бу босуобуйаны кыаммат ыаллар ылар кыахтаахтар. Ол аата дьиэ кэргэн хас биирдии чилиэнигэр тиксэринэн, тиийинэн олоруу алын кээмэйиттэн намыһах дохуоттаах буоллахтарына, бэриллэр. Эрэгийиэн төлөбүрдэрэ оннунан хаалаллар.
Босуобуйа кээмэйэ — эрэгийиэҥҥэ олохтоммут тиийинэн олоруу алын кээмэйин аҥаарын саҕа суумаҕа тэҥнэһэр. Дойду үрдүнэн бу суума 5,5 тыһыынча солкуобайга тэҥнэһэр, оттон Саха сиригэр — 8,5 тыһыынча солкуобайга.
Босуобуйаны 2 мөлүйүөн оҕолоох ыаллар ылыахтара. Ол туһугар 136,4 миллиард солкуобайы бүддьүөттэн көрүөхтэрэ.
Ангелина Васильева, »Сахасирэ» хаһыат, edersaas.ru