Ил Дархан Айсен Николаев Уһук Илин эрэгийиэн эдэр ыалларыгар ипотека бырыһыанын 2%-ҥа диэри түһэрэргэ киллэрбит этиитин дойду Бэрэсидьиэнэ Владимир Путин өйөөтө.
edersaas.ru
Чэпчэтиллибит ипотека бырагыраамата быйыл олоххо киирэн, Уһук Илин эрэгийиэннэригэр олорор эдэр ыаллар 2%-наах кирэдьиити ылан дьиэлэнэр кыахтаныахтара. Ол туһунан Илиҥҥи экэнэмиичэскэй V форум пленарнай мунньаҕар дойду аҕа баһылыга Владимир Путин иһитиннэрдэ. «Уһук Илин олохтоохторун ити курдук өйүүр ньыма хайаан да наадалааҕын туһунан миэхэ эппиттэрин ылынным. Хомойуох иһин, дойду үрдүнэн барыларыгар чэпчэтии оҥорор кыаллыбат. Бу ураты бырайыак Уһук Илиҥҥэ биэс сыл устата үлэлиэҕэ, ити кэм иһигэр тустаах көмө төһө көдьүүстээҕин ааҕан таһаарыахпыт», — диэтэ кини.
Ону таһынан, Уһук Илин дьонун олоҕун таһымын тупсарар сыалтан кытыы нэһилиэктэргэ үлэлии кэлэр быраастар хамнастарын икки төгүл үрдэтэр туһунан эттэ Владимир Путин.
Марианна Тыртыкова, «Саха сирэ», edersaas.ru