Үгүс дьон сарсыарда ойон турдулар даҕаны хайдах күн-дьыл үүммүтүн түннүгүнэн көрөллөр, араадьыйаларын холбоон күн-дьыл туругун истэллэр. Бүгүн сарсыарда 9 чааска Гимеин оройуонугар -10 кыраадыс этэ. Метеорологтар билгэлиир чахчыларын итэҕэйэбит уонна олохпутугар-дьаһахпытыгар туһанабыт. Ордук хоту дойду дьоно буурҕа эҥин түһэр буоллаҕына, ыраах айаҥҥа турумматтар. Онон бу сулууспа дьон олоҕо-дьаһаҕа куттала суох буолуутун хааччыйар диэтэххэ сыыспаппыт буолуо. Ордук сааскы халаан кэмигэр кинилэр билгэлээһиннэрин кэтэһээччи үгүс. Ол билгэлэргэ олоҕуран дьон сүөһүтүн-аһын үрдүк сиргэ үүрэр, дьиэтин-уотун дьаһанарын билэбит.
Бүгүн аан дойдуга Метеоролог күнэ бэлиэтэнэр. Гидрометеосулууспа Саха сиринээҕи управлениетыгар 287 кэтээн көрөр пуун баар.
— Ол иһигэр 8 полярнай ыстаансыйа, 34 – ыраах сытар ыстаансыйа, 99 – метеостанция, 15 – аэрологическай , 10 – гидрологическай ыстаансыйалар бааллар. Маны сэргэ Чернышевскайга күөл гидрологиятын үөрэтэр 1 ыстаансыйалаахпыт. Покровскайга агрометеорологическай ыстаансыйа диэн баар. 168 гидрологическай пуостардаахпыт. Өссө 7 ыстаансыйа салгын киртийиитин кэтээн көрөр. Биллэн турар, ыраах сытар, уустук суоллаах ыстаансыйаларбытыгар үксүн эдэрдэр үлэлииллэр. Маннык ыстаансыйаларга 4-түү киһи үлэлиэхтээҕин иккилии киһи үлэлиир. Тоҕо диэтэххэ, каадырдар тиийбэттэр, — диэн кылгастык кэпсээтэ кэтээн көрүү судаарыстыбаннай сулууспатын уонна ыстаансыйалар ситимнэрин үлэлэрин тэрийиини сүрүннээччи Елена Ершова.
Гидрометеосулууспа сүрүн үлэлэриттэн биирдэстэринэн аэрологическай кэтээн көрүүлэр буолаллар. Аэрологическай иһитиннэрии күн-дьыл туругар олус суолталаах, ону тэҥэ туһанааччыларга наадалаах. Аэрологическай кэтээн көрүү Дьокуускайга, Алдаҥҥа, Эдьигээҥҥэ, Дьааҥыга, Котельнайга, Өймөкөөҥҥө, Тиксиигэ, Өлөөҥҥө, Өлүөхүмэҕэ, Черскэйгэ, Чокурдаахха, Витимҥэ, Мииринэйгэ, Зырянкаҕа, Бүлүүгэ ыытыллар.
Бэлэмнээтэ Женни Стрюкова
Хаартыска: https://www.pomorie.ru/2020/03/23/5e7781af764de9ced65b4372.html