Маны аах Тыа хаһаайыстыбата

Айсен Николаев Чурапчыга оту бэлэмнээһиҥҥэ соруктары туруорда

Чурапчы улууһугар оттооһун кыһалҕалаах боппуруостарын тула бүгүн Ил Дархан Айсен Николаев улуус баһылыгын Степан Саргыдаевы кытта ырыттылар. От үлэтэ курааҥҥа уонна аһыҥа наһаалаабыт кэмигэр бара турар.

«Быйыл улууспутугар 39 тыһыынча туонна оту бэлэмниэхтээхпит. Бүгүҥҥү күҥҥэ былаан 27 % туолла. От атыылаһарбытын уонна атын улуустартан арыандаласпыт учаастактарбытыгар оттуурбутун былаанныыбыт. Мобильнай биригээдэлэр 9 тыһыынча 900 туонна оту бэлэмниэхтээхтэр», — диэн Степан Анатольевич былааннарын үллэһиннэ.

Кураан күн-дьыл уонна аһыҥа саба түһүүтэ оту бэлэмнээһиҥҥэ уустуктары үөскэтэллэр. «Биир квадратнай миэтэрэҕэ 72 аһыҥаны аахтыбыт, онон алаас ото үүммэтэ», — диэн улуус баһылыга бэлиэтиир. Чурапчыга окко үрдүк бэлэмнээх буолуу эрэсиимэ биллэрилиннэ, суһал ыстаап тэрилиннэ.

Ил Дархан мобильнай биригээдэлэри тэрийии оттооһуҥҥа көмө буолуохтарын ыйда. «Чурапчы улууһугар уустук балаһыанньанан мобильнай биригээдэлэри тэрийэргэ көмө наада. Маннык соруктар бырабыыталыстыбаҕа уонна Тыа хаһаайыстыбатын министиэристибэтигэр бэрилиннилэр», —  диир Айсен Николаев.

Степан Саргыдаев Чурапчыттан Амма Абаҕатыгар уонна Соморсунугар, Хаҥаласка үлэлиир мобильнай биригээдэри кытта дуогабар баарын эттэ. Итиэннэ Нам уонна Уус Майа оройуоннарын кытта кэпсэтии ыытыллар. Урут сэбиэскэй кэм саҕана курааҥҥа чурапчылар бу улуустарга окко үлэлээбиттэр эбит. Маннык 57 мобильнай биригээдэни тэрийэр былаан баар.

Чурапчы баһылыгын иһитиннэриитинэн, үүт былаана — 5 тыһыынча 474 туонна. Билигин ол аҥаара — 2 995 туонна туолбут. «Былааны толоруохпут, Чурапчы аһынан атын улуустары, киин куораты хааччыйыахпыт», — диир Степан Анатольевич.

Көрсүһүү кэмигэр оройуону гаастааһын уонна быраҕыллыбыт сирдэри чөлүгэр түһэрии үлэтин туһунан кэпсэтии барда.

Ил Дархан уонна Бырабыыталыстыба дьаһалтатын пресс-сулууспата.

Мария Васильева хаартыската, СИА.

0
0
Telegram @edersaas20