Кулун тутар 19 күнүнээҕи туругунан, Саха сиригэр 27 киһи саҥа коронавируснай инфекциянан саҥа ыалдьыбыта бигэргэннэ диэн өрөспүүбүлүкэтээҕи суһал ыстаап иһитиннэрэр.
Ол иһигэр, Дьокуускайга – 18, Алдаҥҥа – 3, Мэҥэ Хаҥаласка, Томпоҕо – 2-лии, Ленскэйгэ, Өлүөхүмэҥэ биирдии киһи ыалдьыбыт.
Суукка иһигэр коронавируснай инфекцияны быһаарар 1754 анаалыс оҥоһуллубут. Пандемия саҕаланыаҕыттан өрөспүүбүлүкэ үрдүнэн барыта 993 963 анаалыс оҥоһуллубут.
Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, вакцинация салҕанар. Барыта 55 593 устуука быһыы кэлбититтэн, барытын кэриэтэ дьоҥҥо бэрилиннэ. Кэлэр нэдиэлэҕэ быһыы өссө кэлиэхтээх.
Төһө да ыарыы ахсаана намтаатар, хааччахтыыр миэрэлэр сымнааталлар, бэйэни харыстаныы миэрэлэрин (маасканы кэтии, тэйиччи сылдьыы, о.д.а.) тутуһуу ирдэнэр.
Ангелина Васильева, “Саха сирэ” хаһыат, edersaas.ru