Өрөспүүбүлүкэтээҕи оҕо анал спортивнай оскуолата 2004-2005 сыллардааҕы төрүөх уолаттарга уонна кыргыттарга сыл аайы ыытыллар “Саха-Азия оҕолоро” норуоттар икки ардыларынааҕы оҕо пуондатын куубагар өрөспүүбүлүкэтээҕи турниры тэрийэр.
Бу турнир Саха Өрөспүүбүлүкэтин буоксаҕа сүүмэрдэммит хамаандатыгар киллэрии бастакы түһүмэҕинэн буолар. Кыайыылаахтар уонна призердар 2020 сылга Монголия Улан-Баторыгар ыытыллар VII норуоттар икки ардыларынааҕы “Азия оҕолоро” оонньууга кыттарга хандьыдаат быһыытынан талыллыахтара.
Тэрийээччилэр биллэрбиттэринэн, быйыл өрөспүүбүлүкэ араас оскуолаларыттан 260 кыттааччы сайаапка түһэрбит. “Саха-Азия оҕолоро” норуоттар икки ардыларынааҕы оҕо пуондатын куубагын өрөспүүбүлүкэтээҕи турнира сыл аайы оҕолорго өрөспүүбүлүкэ бастыҥ боксердарын түмэр. Оҕо сылдьан бу күрэхтэһииттэн аан дойду иккис призера, Европа чөмпүйүөнэ Василий Егоров уонна Арассыыйа первенствотын икки төгүллээх кыайыылааҕа, Европаҕа уонна аан дойдуга бастыыр иһин күрэхтэһиилэр кыттыылаахтара Айтал Дьяконов кынаттанан тахсыбыттара.
Николай Попов, «Саха сирэ» хаһыат, edersaas.ru