Оҕо көмүскэлин күнүгэр Тыа хаһаайыстыбатын уонна ас-үөл бэлиитикэтин министиэристибэтин дьиэтин иһэ оҕо аймах көхтөөх саҥатынан туолла.
Бу күн бырабыыталыстыба баһылыгын бастакы солбуйааччы — Тыа хаһаайыстыбатын уонна ас-үөл бэлиитикэтин миниистирэ Петр Алексеев “2014-2017 сс. уонна 2020 сылга диэри тыа сирин территорияларын бигэтик сайыннарыы“ тус сыаллаах федеральнай бырагыраама чэрчитинэн элбэх оҕолоох ыалларга саҥа дьиэ тутуутугар сертификаттары туттарда.
Дьиэ туттарга судаарыстыба көрөр харчынан көмөтүн сертификатын ыла Амма, Горнай, Мэҥэ Хаҥалас, Нам, Хаҥалас уонна Чурапчы улуустарыттан элбэх оҕолоох сүүрбэ алта эдэр ыал оҕолорун илдьэ киирбиттэр. Петр Алексеев министиэристибэ кырачаан ыалдьыттарын Оҕо көмүскэлин күнүнэн минньигэс аһынан күндүлээтэ итиэннэ өйдөбүнньүк сувенирдары – саха ыалыгар дьолоох олоҕу түстүүр Дьөһөгөй оҕотун бэлэхтээтэ.
Кэлиҥҥи сылларга олорор дьиэни-уоту тутууга сыллата 400 ыал судаарыстыба көмөтүнэн туһанар. Онуоха ирдэбил биир – саҥа дьиэлэр аныгы олох сиэринэн тупсаҕай көстүүлээх, толору хааччыллыылаах оҥоһуллуохтаахтар. Ааспыт 2016 с. 424 дьиэ үлэҕэ киллэриллибитэ. Быйыл 434 ыал дьиэ туттуохтаах.
Санатан эттэххэ, дьиэни тутуу ороскуотун 70 бырыһыанын толуйар субсидия тыа сиригэр олорор, тыа хаһаайыстыбатыгар үлэлиир-хамсыыр, сир учаастактаах, дьиэҕэ наадыйар уонна сөптөөх дохуоттаах (өлүүлэһэн тутууга дьиэ уопсай сыанатын 30 бырыһыанын уйунар кыахтаах) ыалларга бэриллэр.
Нам улууһуттан Хамаҕатта нэһилиэгин “В.А.Герасимов” бааһынай хаһаайыстыба мэхээнньигэ Михаил Афанасьевич Петров сертификат ылбыт эдэр ыаллар ааттарыттан министиэристибэ бары үлэһиттэригэр махталын биллэрдэ, чэгиэн-чэбдик доруобуйаны, дьоллоох-соргулаах олоҕу, үлэҕэ-хамнаска ситиһиини баҕарда.
Раиса СИБИРЯКОВА, “Саха сирэ” хаһыат, edersaas.ru