Кулун тутар 21 күнүгэр Ил Дархан Айсен Николаев өрөспүүбүлүкэҕэ коронавирус балаһыанньатын туһунан билиһиннэрдэ.
edersaas.ru
Күн бүгүн коронавируһунан ыалдьыбыт дьоннуун хантаактаспыт 256 киһи анаалыһа бигэргэммэтэ. Ол эбэтэр, кинилэр ыалдьыбатахтар. Бу үөрүүлээх сонун диэн Айсен Сергеевич тоһоҕолоон бэлиэтээтэ.
Инфекционнай балыыһаҕа билигин 28, ол иһигэр диагнозтара бигэргэммит 7 киһи сытар. Кинилэрдиин алтыспыт 207 киһи баара билиннэ.
Ордук болҕомто омук дойдуларыттан кэлбит дьоҥҥо ууруллар. Билиҥҥитэ
2841 киһи дьиэтигэр »изоляцияҕа» олорор. Бу дойду кылаабынай санитарнай бырааһын булгуччулаах ирдэбилэ. Кинилэртэн ким эрэ ыалдьыбыт, тумуулаабыт буоллаҕына, хайаан да бырааһы ыҥырыахтаах, оччоҕо балыыһаҕа киллэрэллэр. Бу ирдэбиллэри кэспит дьон административнай эппиэтинэскэ тардыллыахтара.
Үгүс судаарыстыбаннай, муниципальнай тэрилтэлэр дьиэлэригэр олорон үлэлиир эрэсиимҥэ көһөн эрэллэр. Ол эрээри, билиҥҥитэ атыы-эргиэн дьиэлэрин, аһыыр сирдэр үлэлэрин хааччахтааһын суох.
Ил Дархан дьон элбэхтик мустар сирдэригэр сылдьыбакка, төһө кыалларынан дьиэҕэолорорго, сааһырбыт дьону харыстыырга ыҥырда.
Ангелина Васильева, «Саха сирэ» хаһыат, edersaas.ru