Дьиэҕэ-уокка, хочуолу тутууга сыһыаннаах ыйытыылар болҕомтону тартылар

Ааптар: Эдэр Саас

Бөлөххө киир:

СӨ Бырабыыталыстыбатын 2021 сыллааҕы үлэтин отчуотун кэмигэр, дьиэ-уот хапытаалынай өрөмүөнүгэр, хочуолунайы тутууга, ОДьКХ сыһыаннаах элбэх ыйытыы киирдэ.

Бүгүн нэһилиэнньэ иннигэр отчуоту иһитиннэриигэ СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников, ОДьКХ уонна энергетикэ миниистирэ Вячеслав Емельянов, тырааныспар уонна суол хаһаайыстыбатын миниистирэ Владимир Сивцев, экология миниистирин э.т. Евгений Перфильев, уо.д.а. кытыннылар.
Өрөспүүбүлүкэ олохтоохторо олох-дьаһах хомунаалынай хаһаайыстыбатыгар сыһыаннаах ыйытыылары, ордук киин ититэр систиэмэҕэ кэтэх дьиэлэри холбууру, элбэх кыбартыыралаах дьиэлэргэ хапытаалынай өрөмүөнү, кытаанах бөҕү харайыы туһунан, о.д.а. биэрдилэр.

Ол курдук, Амма олохтооҕо Матрена:»Стадион» хочуолунай быйыл үлэҕэ киирэр дуо уонна «Молодежнай» түөлбэҕэ олорор ыаллар дьиэлэрэ ититэр систиэмэҕэ хаһан холбонуой. Манна туох үлэ барарый?» — диэн ыйытта.

Вячеслав Емельянов «Стадион» хочуолунай боппуруоһа турбута өр буолбутун бэлиэтээтэ: — Былырыын нэһилиэги уонна оройуону кытары үлэлэспиппит. Быйыл ОДЬКХ ГУП инвестиционнай бырагырааматынан хочуолунай тутуутун былааннаабыппыт. Онон быйыл хочуолунай тутуута уонна эһиилгиттэн дьиэлэри күргүөмүнэн ититиигэ холбуур үлэ саҕаланыаҕа, — диэн эттэ.

Покровскай олохтооҕо 1983 сыллаахха тутуллубут дьиэҕэ олорорун, дьиэ эргэрбитин, ону туоһулуур докумуону хантан ылыахха сөптөөҕүн ыйыталаста.

—Бастатан туран, дьиэ эрэгийиэннээҕи хапытаалынай өрөмүөн бырагырааматыгар киирэригэр хамыыһыйа үлэлиэхтээх. Ол хамыыһыйаҕа олохтоох дьаһалта, госстройжилнадзор үлэлээннэр, хапытаалынай өрөмүөн пуондатын чэрчитинэн хамыыһыйа дьиэ бу бырагыраамаҕа киириэн сөптөөҕүн туһунан быһаарыыны ылыахтаахтар. Оччотугар эрэгийиэн бырагырааматыгар киирэр. Оттон дьиэни саахалланар туруктаах диир буолаххытына, эмиэ итинник хамыыһыйа үлэлээн акт оҥордоҕуна, бу дьиэ саахалланар туруктаах дьиэҕэ киирэр. Дьиэ хаарбах туруктаах буоллаҕына, СӨ Тутуу министиэристибэтин бырагырааматынан хаарбахтан саҥаҕа көһөрүү бырагырааматыгар киириэн сөп, — диэн Вячеслав Павлович хоруйдаата.

Манна даҕатан сырдаттахха, судаарыстыбаннай өйөбүл механизмнарын олоххо киллэриини, олорор дьиэни тутууну сайыннарыы уонна дьиэ ырыынагын көҕүлээһин көмөтүнэн Саха Өрөспүүбүлүкэтин нэһилиэнньэтин олорор дьиэнэн-уотунан хааччыйыы олорор дьиэ бэлиитикэтин сүрүн сыалынан буолар. Саахалланар туруктаах олорор дьиэ пуондатыттан гражданнары көһөрүү бырагырааматын чэрчитинэн бырагырааманы олоххо киллэрии саҕаланыаҕыттан (2019-2021 сс.) 325,2 тыһ. кв.м иэннээх дьиэттэн-уоттан 18,1 тыһ. киһи көһөрүлүннэ, ол иһигэр 2021 сылга 245,5 тыһ. кв.м иэннээх дьиэттэн-уоттан 12 тыһ. киһи көһөрүлүннэ, 82 элбэх кыбартыыралаах дьиэ тутуллан үлэҕэ киирдэ.